ठाण्यात पावसाने उडवली तारांबळ

ठाण्यात पावसाने उडवली तारांबळ
ऐन दिवाळीत मुसळधार पाऊस
सकाळ वृत्तसेवा
ठाणे, ता. १६ ः दिवाळीला अवघे दोन ते तीन दिवस शिल्लक असताना ठाणेकर खरेदीत रमले होते. बाजारपेठा रंगीबेरंगी रोषणाईने उजळल्या होत्या; मात्र गुरुवारी (ता. १६) सायंकाळी विजांच्या कडकडाटासह कोसळलेल्या मुसळधार पावसाने या सणासुदीच्या उत्साहावर विरजण घातले. अचानक आलेल्या पावसामुळे विक्रेत्यांचे मोठे नुकसान झाले असून नागरिकांचीही चांगलीच तारांबळ उडाली.
दिवाळीनिमित्त ठाण्यातील गोखले रोड, नौपाडा, गावदेवी, राम मारुती रोड आणि जांभळी नाका परिसरातील बाजारपेठा ग्राहकांनी फुलून गेल्या होत्या. कंदील, पणत्या, रांगोळ्या, कपडे, घरसजावटीच्या वस्तू आणि किल्ल्यांसाठी लागणारे मावळे यांची विक्री मोठ्या प्रमाणावर सुरू होती. ग्राहकांना आकर्षित करण्यासाठी व्यापाऱ्यांकडून विशेष सवलतीही देण्यात आल्या होत्या. दरम्यान, गुरुवारी सायंकाळी अचानक आलेल्या मुसळधार पावसामुळे विक्रेत्यांपासून ग्राहकांपर्यंत सर्वांचीच धांदल उडाली. जो तो आडोशाला धाव घेताना दिसला. खुल्या जागेत दुकाने मांडलेल्या फेरीवाल्यांचे मात्र या पावसामुळे मोठे नुकसान झाले. रांगोळी व पणत्या विक्रेत्यांच्या वस्तू पाण्यात भिजून खराब झाल्या, तर मावळ्यांचा रंग उडाल्याने ते विक्रीयोग्य राहिले नाहीत.
या पावसामुळे बाजारपेठ काही काळ ओस पडली आणि दिवाळी खरेदीचा मूड पूर्णपणे ढेपाळला. ग्राहकांचा हिरमोड झाला असला तरी व्यापाऱ्यांनी आशा व्यक्त केली की पुढील दोन दिवसांत पुन्हा खरेदीला चांगली गती मिळेल.