घणसोलीत पुन्हा दहावीच्या विद्यार्थिनीची आत्महत्या

विद्यार्थिनीच्या आत्महत्येप्रकरणी गुन्हा दाखल
नवी मुंबई, ता. १६ (वार्ताहर) : घणसोलीत दहावीच्या विद्यार्थिनीने राहत्या घरात गळफास घेऊन आत्महत्या केली. मृत विद्यार्थिनी शमिका नागेश गावडे (वय १५) दहावीच्या परीक्षेची तयारी करीत होती. बुधवारी (ता. १५) सायंकाळी क्लासमध्ये मैत्रिणीशी झालेल्या किरकोळ वादानंतर मैत्रिणीची आई रेश्मा गवांदे हिने शमिकाला आपल्या घरी बोलावून घेतले आणि शमिकाला धारेवर धरून तिच्या आईवडिलांविषयी अपमानास्पद शब्द वापरले. या वेळी रेश्माने शमिकाला मारहाणही केली.
हा अपमान शमिकाच्या जिव्हारी लागल्याने तिने मानसिक तणावाखाली येऊन गळफास घेऊन आत्महत्या केली. शमिकाने आत्महत्येपूर्वी लिहून ठेवलेली चिठ्ठी रबाळे पोलिसांनी ताब्यात घेतली आहे. शमिकाला मारहाण, अपशब्द वापरून अपमान करणाऱ्या रेश्मा गवांदे (वय ४२) व मयूरी नाईकवडी (वय ४०) या महिलांविरोधात आत्महत्येस प्रवृत्त केल्याप्रकरणी गुन्हा दाखल केला आहे. या दोन्ही महिलांवर पुढील कारवाई सुरू असल्याची माहिती वरिष्ठ पोलिस निरीक्षक बाळकृष्ण सावंत यांनी दिली.