‘मिठी घोटाळ्या’तील आरोपीला जामीन देण्यास नाकार

‘मिठी घोटाळ्या’तील आरोपीला जामीन देण्यास नकार

सकाळ वृत्तसेवा
मुंबई, ता. १६ ः मिठी नदीतील गाळ काढण्याशी संबंधित घोटाळ्याप्रकरणी अटकेत असलेल्या कथित मध्यस्थ आणि कंपनीचे सीईओ केतन कदम यांना जामीन देण्यास अतिरिक्त मुख्य न्यायदंडाधिकाऱ्यांनी नुकताच नकार दिला. 
अर्जदाराचा गुन्ह्यात थेट सहभाग असल्याचे निरीक्षण अतिरिक्त सत्र न्यायाधीश एन. जी. शुक्ला यांनी कदम यांचा जामीन अर्ज फेटाळताना नोंदवले. त्या आदेशाची प्रत गुरुवारी (ता. १६) उपलब्ध झाली. सत्र न्यायालयाने कदम यांना जामीन नाकारण्याची ही दुसरी वेळ होती. याप्रकरणी अन्य सह आरोपींना जामीन मंजूर करण्यात आला आहे. त्या समानतेच्या आधारावर, आपल्याला ही जामीन देण्याची मागणी कदम यांनी केली होती; परंतु याप्रकरणी अर्जदाराची भूमिका सह आरोपींपेक्षा खूपच वेगळी आणि गंभीर आहे. त्यांचा गुन्ह्यात थेट सहभाग आहे आणि त्यांनी शेल कंपन्यांमध्ये कंत्राटदारांकडून मिळालेल्या पैशाचे व्यवस्थापन केल्याचेही न्यायालयाने म्हटले आहे. अर्जदार एक प्रभावशाली व्यक्ती असून जामिनावर सुटका झाल्यास तो पुराव्यांशी छेडछाड करण्याची आणि साक्षीदारांना धमकावण्याची शक्यता नाकारता येत नाही, असेही न्यायालयाने कदम यांचा जामीन अर्ज फेटाळताना नमूद केले.
कदम यांनी मुंबई महापालिकेला कोची येथील कंपनी मॅटप्रॉप टेक्निकल सर्व्हिसेस या कंपनीच्या गाळ पुशर मशीन आणि ड्रेजिंग उपकरणे भाड्याने देण्यासाठी अधिकची रक्कम आकारली. तसेच कंपनी आणि महापालिकेच्या पर्जन्यजल वाहिनी विभागातील अधिकाऱ्यांशी संगनमत करून हा घोटाळा केल्याचा आरोप आहे.