२६ लाखांचा फराळ फस्त

२६ लाखांचा फराळ फस्त
जिल्ह्यातील महिला बचत गटाच्या उत्पादनांना मागणी
अलिबाग, ता. १८ (वार्ताहर) ः दिवाळीनिमित्त फराळाला महत्त्व असते. रायगड जिल्ह्यामध्ये महिला स्वयंसहाय्यता समूहांनी बनवलेल्या फराळाला मोठ्या प्रमाणात मागणी असून आतापर्यंत २६ लाख १६ हजार ४०० रुपयांच्या विक्री झाली आहे.
रायगड जिल्हा परिषदेच्या मुख्य कार्यकारी अधिकारी नेहा भोसले, प्रकल्प संचालक प्रियदर्शिनी मोरे यांच्या संकल्पनेतून तालुका, प्रभाग, ग्रामस्तरावर स्वयंसहाय्यता समूहांनी बनवलेल्या फराळाच्या विक्रीसाठी स्टॉल उभारण्यात आले. याअंतर्गत २५७ समूहांनी बनवलेला दिवाळी फराळ, सजावटीचे साहित्य, कंदील, पणत्या, सुगंधी उटणे बनवले आहे. स्वयंसहाय्यता समूहातील महिलांना आत्मनिर्भर बनवण्याच्या दृष्टीने तसेच उत्पन्नवाढीस चालना मिळावी, यासाठी बाजारपेठ उपलब्ध करून देण्याच्या दृष्टीने राज्यस्तरावर मुंबई येथे मंत्रालय, कोकण भवन सीबीडी-बेलापूर, उमेद कार्यालय येथे दिवाळी फराळाचे स्टॉल लावण्यात आले. या स्टॉलला चांगला प्रतिसाद मिळत आहे. तसेच घरगुती फराळाची मोठ्या प्रमाणात विक्री होत आहे.
----------------------------
२५७ स्वयंसहाय्यता समूहांचा सहभाग
जिल्ह्यातील प्रभाग, संघ स्तरावर व पंचायत समिती प्रांगणामध्ये तालुका अभियान व्यवस्थापन कक्षाच्या वतीने स्टॉल उभारण्यात आले. ग्राहकांचा, अधिकारी वर्गाचा मोठ्या प्रमाणात प्रतिसाद लाभला. घरगुती चव, महिलांनी बनवलेली रुचकर पदार्थ यामुळे महिलांना दिवाळी सणानिमित्त मोठ्या प्रमाणात विक्री होत आहे. या उपक्रमातून जिल्ह्यातून २५७ स्वयंसहाय्यता समूहांनी सहभाग घेतला आहे.