दिवाळी गड-किल्ला स्पर्धेतून विद्यार्थ्यांनी जपली शिवकालीन वारसा!

गड-किल्ला स्पर्धेतून विद्यार्थ्यांनी जपला शिवकालीन वारसा
ठाणे, ता. १९ (बातमीदार) ः ठाण्यातील एन.के.टी. व जे.एन.के.टी. महाविद्यालय यांच्या वतीने दिवाळी गड-किल्ला स्पर्धेचे आयोजन करण्यात आले होते. ही स्पर्धा महाविद्यालयाच्या मराठी वाङ्‍मय विभागाकडून १३ ते १६ ऑक्टोबरदरम्यान घेण्यात आली.
या उपक्रमांतर्गत विद्यार्थ्यांनी सलग तीन दिवस मेहनत घेत रायगड, सिंधुदुर्ग, शिवनेरी, जंजिरा आणि पुरंदर हे पाच ऐतिहासिक किल्ले साकारले. मातीतून घडवलेले हे किल्ले केवळ कलाकृती नव्हते, तर शिवकालीन इतिहासाची जिवंत झलक होते. या स्पर्धेचा मुख्य उद्देश छत्रपती शिवाजी महाराजांचे गड-किल्ले, त्यांचे ऐतिहासिक महत्त्व आणि मराठी संस्कृतीची ओळख नव्या पिढीला करून देणे हा होता. महाविद्यालयाच्या संस्थापक शेठ नानजीभाई खिमजीभाई ठक्कर व प्राचार्य दिलीप पाटील यांनी विद्यार्थ्यांना विशेष मार्गदर्शन व प्रोत्साहन दिले. या उपक्रमाला केवळ विद्यार्थ्यांचाच नव्हे, तर सामान्य नागरिकांचाही उत्स्फूर्त प्रतिसाद लाभला.
विद्यार्थिनी स्वरूपा परब यांनी सांगितले, की या स्पर्धेमुळे आम्ही फक्त किल्ले साकारले नाहीत, तर शिवरायांच्या कार्याचे महत्त्वही सर्वांपर्यंत पोहोचले. हा अनुभव आमच्यासाठी प्रेरणादायी ठरला. ही स्पर्धा म्हणजे केवळ एक स्पर्धा नसून, मराठी परंपरेची, इतिहासाची आणि स्वाभिमानाची प्रेरणायात्रा होती.