बेस्टचे कंत्राटी कामगार बोनसपासून वंचित

बेस्टचे कंत्राटी कामगार
दिवाळी बोनसपासून वंचित
सकाळ वृत्तसेवा
मुंबई, ता. १८ ः बेस्टच्या कंत्राटी कामगारांना दिवाळीनिमित्त बोनस अद्याप मिळालेला नाही. त्यामुळे कामगारांची दिवाळी अंधारात आहे. या कामगारांना बोनस द्यावा, अन्यथा आंदोलन करण्याचा इशारा मुंबई इलेक्ट्रिक वर्कर्स युनियनचे सरचिटणीस विठ्ठलराव गायकवाड यांनी दिला आहे.
बेस्टच्या कायमस्वरूपी कामगारांना आणि अधिकाऱ्यांना ३१ हजार रुपये सानुग्रह अनुदान मिळाले आहे. बेस्ट प्रशासनाने हे अनुदान नुकतेच कामगारांच्या खात्यावर जमा केले आहे. पालिका कर्मचाऱ्यांच्या धर्तीवर बेस्ट कर्मचाऱ्यांना सानुग्रह अनुदान दिले आहे. त्यामुळे कामगार आणि अधिकाऱ्यांमध्ये आनंदाचे वातावरण आहे; मात्र कंत्राटी कामगारांना बोनस न मिळाल्याने कामगारांमध्ये नाराजी पसरली आहे.
अदाणी इलेक्ट्रिसिटी मुंबई कंपनी आस्थापना विभागातील स्थायी कामगारांची तीन हजार पदे रिक्त आहेत. ही पदे भरलेली नाहीत, तसेच या पदांवर कामगारांना पदोन्नती दिली गेलेली नाही. त्यामुळे रिक्त पदे तातडीने भरण्यात यावीत, तसेच कामगारांना पदोन्नती द्यावी, अशीही मागणी कामगार नेते गायकवाड यांनी केली आहे.