आंतर-महाविद्यालयीन बास्केटबॉल स्पर्धा

आंतर महाविद्यालयीन बास्केटबॉल स्पर्धा उत्साहात
नेरुळ, ता. १९ (बातमीदार) ः एस. के. कॉलेज ऑफ सायन्स अँड कॉमर्स (ऑटोनॉमस), सीवूड्स येथे १५ आणि १६ ऑक्टोबर रोजी दोनदिवसीय आंतर महाविद्यालयीन बास्केटबॉल स्पर्धा पार पडल्या. ही स्पर्धा मुंबई विद्यापीठाच्या संयुक्त विद्यमाने पार पडली. स्पर्धेच्या पपुरुष गटातील एकूण १३ महाविद्यालयांतील विद्यार्थ्यांनी तर महिला गटातील १० महाविद्यालयांतील विद्यार्थिनींनी उत्साहाने सहभाग नोंदविला. दोन दिवस चाललेल्या या स्पर्धेत एकूण २४० विद्यार्थ्यांनी सहभाग घेतला. पुरुष गटात प्रथम क्रमांक एस. आय. इ. एस. कॉलेज (ऑटोनॉमस), नेरूळने पटकावला, तर महिला गटात बी. के. बिरला कॉलेज विजयी ठरले.
मुंबई विद्यापीठाचे अधिकारी यांनी संपूर्ण स्पर्धेची पाहणी करून आयोजनाचे कौतुक केले. महाविद्यालयाचे संचालक डॉ. अजित कुरूप यांनी आपली उपस्थिती दर्शवून खेळाडूंना प्रोत्साहन दिले. महाविद्यालयाच्या प्राचार्या डॉ. स्वाती विटकर यांनी स्पर्धेच्या यशस्वी आयोजनासाठी सर्व शिक्षक, शिक्षकेतर कर्मचारी व विद्यार्थ्यांना मार्गदर्शन केले. दोनदिवसीय या स्पर्धेला विद्यार्थ्यांनी दिलेला उत्स्फूर्त प्रतिसाद आणि क्रीडाप्रेम पाहता, महाविद्यालयात क्रीडा संस्कार आणि संघभावनेचा सुंदर अविष्कार पाहायला मिळाला.