‘तेजस’चा वक्तशीरपणा घसरला

‘तेजस’चा वक्तशीरपणा घसरला
प्रवाशांत नाराजीचा सूर; सुविधांचा दर्जाही घसरला
सकाळ वृत्तसेवा
मुंबई, ता. १९ ः आलिशान प्रवासाची सुविधा देणारी ‘तेजस एक्स्प्रेस’ ही गाडी अडचणीत सापडली आहे. वक्तशीरपणा आणि चांगल्या सुविधा असा लाैकिक असलेली ही गाडी त्याचसाठी बदनाम ठरत आहे. ही गाडी दोन महिन्यांपासून वेळापत्रकापेक्षा तब्बल तीन तास उशिराने धावत आहे. त्याच वेळी सुविधांचा दर्जाही ढासळल्यामुळे प्रवाशांत नाराजीचा सूर आहे.

दर्जेदार भोजन, स्वच्छ कोच, इन्फोटेनमेंट स्क्रीन आणि स्वयंचलित दरवाजे या सुविधांचा बाेजवारा उडाल्याचे दिसत आहे. अनेक स्क्रीन बंद पडल्या असून काही दरवाजे सदोष आहेत. आसनेही फाटलेली असून, स्वच्छतेचाही दर्जा खालावला आहे. दोन महिन्यांपासून गाडी सातत्याने विलंबाने धावत असून १४ आणि २८ ऑगस्ट, ४ आणि १८ सप्टेंबर तसेच ९ ऑक्टोबर या दिवशी गाडी वेळपेक्षा तब्बल तीन तास उशिराने सुटली. विलंबामुळे सुट्टीकालीन प्रवाशांचे नियोजन बिघडत आहे. सामान्य एक्स्प्रेसच्या तुलनेत तेजससाठी १.३ पट अधिक भाडे माेजूनही चांगली सेवा मिळत नसल्याची तक्रार प्रवासी रेल्वे प्रशासनाकडे करीत आहेत.

प्रीमियम दराने प्रवास करतोय; पण सुविधा सामान्य एक्स्प्रेसपेक्षाही वाईट आहेत. भाडे कमी करा किंवा सेवेत सुधारणा करावी, अशी मागणी अखंड कोकण रेल्वे प्रवासी सेवा समितीचे सचिव अक्षय महापदी यांनी केली.

‘तेजस’ऐवजी वंदे भारत एक्स्प्रेस
काही प्रवाशांनी या मार्गावर तेजसऐवजी वंदे भारत एक्स्प्रेस चालवावी, अशीही मागणी पुढे आणली आहे. वंदे भारत गाड्यांसाठी स्वतंत्र देखरेख व्यवस्था आहे आणि त्या वेळेवर धावतात. त्यामुळे ‘तेजस’मध्ये सुधारणा शक्य नसेल तर वंदे भारत सुरू करावी, असे मत प्रवासी संघटनांनी व्यक्त केले आहे.