प्रशिक्षित बेरोजगारांची दिवाळी काळी

प्रशिक्षित बेरोजगारांची दिवाळी काळी
ठाण्यात न्यायालयासमोर केले ठिय्या आंदोलन
सकाळ वृत्तसेबा
ठाणे, ता. १९ : मुख्यमंत्री युवा प्रशिक्षण योजनेनंतर बेरोजगार झालेल्या तरुणांना दिवाळीपूर्वी तोडगा काढण्याचे आश्वासन उपमुख्यमंत्री एकनाथ शिंदे यांनी दिले होते, परंतु आश्वासन पूर्ण न झाल्याने ३६ जिल्ह्यांतील सुमारे दोन हजार बेरोजगार तरुण रविवारी (ता. १९) पुन्हा ठाण्यात धडकले. आमची दिवाळी काळी केली, अशी बोंब ठोकत या तरुणांनी कोर्टाच्या परिसरात दिवसभर ठिय्या आंदोलन केले.
तत्कालीन मुख्यमंत्री एकनाथ शिंदे यांनी दाखवलेल्या कायमस्वरूपी रोजगाराच्या आशेनंतर ११ महिने प्रशिक्षणार्थी म्हणून काम केलेल्या लाखो युवकांना महायुती सरकारने वाऱ्यावर सोडल्याचा आरोप त्यांनी केला आहे. यापूर्वी १३ आंदोलने केल्यानंतर आणि १२ ऑक्टोबर रोजी ठाण्यात धडकल्यानंतर स्वतः उपमुख्यमंत्री शिंदे यांनी आंदोलनकर्त्यांची भेट घेऊन दिवाळीपूर्वी तोडगा काढण्याचे आश्वासन दिले होते. हे आश्वासन पूर्ण न झाल्याने, मुख्यमंत्री युवा कार्य प्रशिक्षणार्थी सहाय्यक संघटनेचे प्रदेश कार्याध्यक्ष बालाजी पाटील-चाकूरकर यांच्या नेतृत्वाखाली ३६ जिल्ह्यांतील सुमारे दोन हजार प्रशिक्षणार्थी ठाणे जिल्हाधिकारी कार्यालयाजवळील कोर्ट नाका येथे धडकले.
‘‘आमची दिवाळी काळी केली,’’ अशी बोंब ठोकत या तरुणांनी दिवसभर ठिय्या दिला. योजनेअंतर्गत राज्यातील सुमारे पावणेदोन लाख युवक बेरोजगार झाले असून, याला सरकार जबाबदार असल्याचा आरोप या वेळी करण्यात आला.