दिवाळीपूर्व वाहतुकीचा मास्टर-प्लॅन

उल्हासनगर, ता. २० (बातमीदार) : दिवाळीच्या पार्श्वभूमीवर उल्हासनगरातील नेहरू चौक परिसर, जो शहरातील सर्वांत मोठी बाजारपेठ मानला जातो. येथे वाढत्या गर्दीचा आणि वाहतूक कोंडीचा प्रश्न हाताळण्यासाठी वाहतूक विभाग, पोलिस प्रशासन आणि व्यापारी संघटनांची संयुक्त बैठक घेऊन वाहतूक व्यवस्थेचा मास्टर-प्लॅन तयार करण्यात आला आहे. अवजड वाहनांना बंदी आणि एकेरी वाहतूक व्यवस्था लागू केली आहे.
दिवाळी काळात बाजारपेठेतील गर्दी वाढत असल्याने वाहतूक सुरळीत ठेवण्यासाठी काही महत्त्वाचे निर्णय घेण्यात आले आहेत. शिरू चौक–नेहरू चौक, पटेल मार्ट–नेहरू चौक, आणि अमन रोड या मार्गांवर आता एकमार्गी वाहतूक लागू करण्यात आली आहे. या मार्गांवर केवळ दुचाकी वाहनांना प्रवेश देण्यात येणार आहे. सकाळी ११ ते रात्री १ वाजेपर्यंत अवजड वाहनांना प्रवेशबंदी घालण्यात आली आहे.
वाहतूक विभागाचे वरिष्ठ पोलिस निरीक्षक राजेश शिरसाठ, वाहतूक शाखेचे नाना आव्हाड, तसेच उल्हासनगर शॉपकीपर असोसिएशनचे अध्यक्ष दीपक छतलानी यांच्या उपस्थितीत ही बैठक झाली. यामध्ये अमन शॉपकीपर असोसिएशन, नेहरू चौक शॉपकीपर असोसिएशन, पूज पंचायत जपानी बाजार आणि न्यू रोड शॉपकीपर असोसिएशन यांचे प्रतिनिधी सहभागी झाले होते. या सर्वांनी मिळून दिवाळीतील नागरिकांच्या सुरक्षिततेला प्राधान्य देत वाहतुकीसंबंधी नियमावलीवर सहमती दर्शवली.
उल्हासनगर महापालिकेच्या बस सेवा पूर्वी गोलमैदान, नेहरू चौक मार्गे प्राचीन शिवमंदिराकडे जात असत. मात्र, सध्या या परिसरात अतिगर्दी आणि पादचारी वाहतुकीचा ताण लक्षात घेऊन महापालिकेच्या बस मार्गात बदल करण्यात आला आहे. आता बस या महापालिकेच्या अंतर्गत मार्गाने प्राचीन शिवमंदिराकडे जाऊ लागल्या आहेत, ज्यामुळे प्रवास अधिक सुरळीत होईल, अशी माहिती प्रशासनाकडून देण्यात आली.

सुरक्षितता, शिस्त हाच उद्देश
वाहतूक विभाग आणि व्यापारी संघटनांच्या या संयुक्त उपक्रमामुळे दिवाळीत खरेदीसाठी आलेल्या नागरिकांना गर्दीतून सुटका मिळणार आहे. तसेच, बाजारपेठेतील रस्ते शिस्तबद्ध आणि सुरक्षित राहावेत, हा या मास्टर-प्लॅनचा प्रमुख उद्देश असल्याचे स्पष्ट करण्यात आले आहे.