९ नोव्हेंबरला पांढरं वादळ मुंबईत धडकणार

मुंबईत ९ नोव्हेंबरला धडकणार पांढरे वादळ
बंजारा समाजाच्या मोर्चात निरंजन नाईक सहभागी होणार
सकाळ वृत्तसेवा
ठाणे, ता. १९ : बंजारा समाजाला अनुसूचित जमाती प्रवर्गाचे आरक्षण मिळावे, या मागणीसाठी येत्या ९ नोव्हेंबर रोजी मुंबईतील शिवाजी पार्क येथे बंजारा समाजाच्या वतीने विशाल मोर्चा (दीपावली मिलन महामेळावा) धडकणार आहे. ‘जय सेवालाल’चा नारा देत हे ‘पांढरं वादळ’ मुंबईत दाखल होईल. माजी मुख्यमंत्री वसंतराव नाईक यांचे चिरंजीव निरंजन नाईक हे या मोर्चात सहभागी होणार असून, ते आंदोलनाला संबोधित करतील. माजी खासदार आणि आंदोलनाचे मार्गदर्शक नेते हरिभाऊ राठोड यांनी ही माहिती दिली. हे आंदोलन केवळ महाराष्ट्रापुरते न ठेवता दिल्लीपर्यंत नेण्याचा निर्धारही त्यांनी व्यक्त केला.
मुख्यमंत्री युवा कार्य प्रशिक्षण योजनेंतर्गत प्रशिक्षण संपलेल्या व सध्या कोणताही मोबदला मिळत नसलेल्या तरुणांनी आज ठाणे जिल्हाधिकारी कार्यालयावर मोर्चा आणला होता. या मोर्चाला संबोधित केल्यानंतर काही युवतींनी हरिभाऊ राठोड यांचे औक्षण केले. तसेच हरिभाऊ राठोड यांनी दिवे प्रज्वलित करून बंजारा भाषेत गाऱ्हाणे मांडले. त्यानंतर झालेल्या पत्रकार परिषदेत हरिभाऊ बोलत होते.