मोकरीवाडीत दीपोत्सवाने झगमगाट

मोकरीवाडीत दीपोत्सवाने झगमगाट
‘संकल्प’कडून आकाशकंदील, फराळाचे वाटप
नवीन पनवेल, ता. २० (बातमीदार)ः नवी मुंबई आंतरराष्ट्रीय विमानतळापासून हाकेच्या अंतरावर असलेल्या करंजाडे मोकरीवाडीतील अनेकांचा चटणी-भाकरीसाठी संघर्ष सुरू आहे. दिवाळीनिमित्त सर्वत्र उत्साह संचारलेला असताना संकल्प शैक्षणिक व सामाजिक संस्थेच्या पुढाकारातून हाच आनंद दीपोत्सवातून साजरा केला जात आहे.
करंजाडेलगत असलेल्या मोकरी आदिवासी पाड्यांवर विकास पोहोचला नाही. पाचवीला पुजलेल्या गरिबीमुळे अन्न, वस्त्र, निवारा, शिक्षण, आरोग्य अशा मूलभूत गरजा पूर्ण करता येत नसल्याने सण, उत्सवाशी त्यांचा फारसा संबंध येत नाही. कारण रोजच्या जगण्यामध्ये संघर्षाशिवाय त्यांना दुसरे सोबती नाहीत. त्यामुळे संकल्प शैक्षणिक, सामाजिक संस्थेच्या संस्थापिका वैशाली जगदाळे यांनी मोकरीवाडीवर दिवाळी साजरी करण्याचा निर्णय घेतला. आदिवासी कुटुंबांना फराळ वाटपाबरोबर सुगंधी उटणे देण्यात आले.
----------------------
आकाशकंदिलांमुळे रोषणाई
संकल्प शैक्षणिक व सामाजिक संस्थेच्या माध्यमातून शेकडो दिवे वाडीवर लावण्यात आले. शुभ दीपावली, असा संदेश देत परिसर पूर्णपणे तेजोमय करण्यात आला. तसेच लावलेल्या आकाशकंदिलांच्या प्रकाशात परिसर उजळून निघाला होता.