आदिवासी पाड्यात दिवाळी फराळ वाटप

आदिवासी पाड्यात दिवाळी फराळ वाटप
कल्याण, ता. २० (वार्ताहर): दिपावली हा सण रोषणाईत, फटाक्यांची आतषबाजी करून तसेच नवनवीन वस्तूंची खरेदी करून साजरा करण्यात येतो. असा हा पारंपरिक दीपोत्सव प्रत्येक घरात आपल्या आर्थिक क्षमतेनुसार साजरा होत असतो. या सणानिमित्त रविवारी मुरबाड तालुक्यातील कातकरी वाडी, काकडपाडा येथील ३० कुटुंबांना दिवाळी फराळ, महिलांना नवीन साड्या आणि कपडे वाटप कार्यक्रमाचे आयोजन ''समन्वय प्रतिष्ठान, कल्याण''तर्फे करण्यात आले होते.

दरम्यान, बहुतांशी आदिवासी समाज शहरापासून दूर असलेल्या ग्रामीण परिसरातील जंगलात वास्तव्यास असल्याने तेथील नैसर्गिक साधनसंपत्तीचे जतन व संवर्धन करण्यास आदिवासी समाजाने पुढाकार घेऊन पर्यावरणाचे संरक्षण केले पाहिजे, असे मत कार्यक्रमाचे अध्यक्ष मंगेश मोहळ यांनी व्यक्त केले. यावेळी संस्थेचे संस्थापक ॲड. जनार्दन टावरे, सचिव संतोष खेताडे, आयोजक रसिक महाडीक, संस्थेचे पदाधिकारी तसेच वाडीतील स्थानिक रहिवासी, दिलीप शिद उपस्थित होते. कार्यक्रमाचे सूत्रसंचालन ॲड. सुनील उबाळे यांनी केले.