कामोठेतील स्वच्छता योद्ध्यांचा दिवाळी सत्कार

कामोठेतील स्वच्छता योद्ध्यांचा दिवाळी सत्कार
‘ॲक्टिव्ह सिटिझन कौन्सिल’चा प्रेरणादायी उपक्रम
पनवेल, ता. २१ (बातमीदार) ः सेक्टर-३४, कामोठे येथे ॲक्टिव्ह सिटिझन कौन्सिल यांच्या वतीने आयोजित क्लिनिंग वॉरियर्स दिवाळी सत्कार कार्यक्रम मोठ्या उत्साहात पार पडला. समाजासाठी निःस्वार्थपणे सेवा करणाऱ्या स्वच्छता कामगारांचा सन्मान करून दिवाळीचा खरा अर्थ प्रकाश, कृतज्ञता आणि प्रेरणा या स्वरूपात साजरा करण्यात आल्याचे या वेळी सांगण्यात आले. या कार्यक्रमाला माजी नगरसेवक विकास घरत उपस्‍थित होते.
या कार्यक्रमात स्वच्छता योद्ध्यांचा सत्कार करून ॲक्टिव्ह सिटिझन कौन्सिल यांनी ‘स्वच्छता हीच खरी सेवा!’ असा महत्त्वपूर्ण सामाजिक संदेश दिला. या उपक्रमामुळे कामोठे परिसरात समाजाभिमुख कार्याबाबत जागरूकता, सहकार्य आणि एकतेची भावना दृढ झाली आहे. कार्यक्रमास अनेक मान्यवरांची उपस्थिती लाभली होती. सर्वांनी स्वच्छता कामगारांच्या परिश्रमाचे कौतुक करत, त्यांचे कार्य म्हणजे शहरातील आरोग्याची खरी पायाभरणी आहे, असे विधान विकास घरात यांनी केले. सत्कार सोहळ्यानंतर उपस्थित नागरिकांनी शहर स्वच्छ ठेवण्याची जबाबदारी सर्वांनी सामूहिकपणे पार पाडावी, अशी प्रतिज्ञाही घेतली. आपल्या परिसराला स्वच्छ, सुंदर आणि निरोगी ठेवणे ही प्रत्येकाची जबाबदारी आहे. स्वच्छता योद्ध्यांचा सन्मान म्हणजे समाजातील आदर्श नागरिकत्वाची खरी ओळख आहे.
या सामाजिक उपक्रमासाठी आयोजक ॲक्टिव्ह सिटिझन कौन्सिल पदाधिकारी, स्वयंसेवक आणि सहकाऱ्यांचे मनःपूर्वक अभिनंदन करण्यात आले.