कर्जत शहरात पिसाळलेल्या बैलाचा धुमाकूळ – एक ठार, पाच जखमी

पिसाळलेल्या बैलाच्या हल्ल्यात एकाचा मृत्यू, पाच जखमी
कर्जत, ता. २३ (बातमीदार) : शहरातील दहिवली परिसरात पिसाळलेल्या बैलाने दोन दिवस धुमाकूळ घातल्याने एका वृद्ध व्यक्तीचा मृत्यू झाला असून, पाच जण जखमी झाले आहेत. दिवाळीच्या सणात घडलेल्या या घटनेमुळे परिसरात भीतीचे वातावरण निर्माण झाले आहे.
बैलाने बुधवारी (ता. २२) रात्रीपासून ते गुरुवारी (ता. २३) पहाटेपर्यंत नागरिकांवर हल्ले केले. बुधवारी रात्री आदित्य कनोजिया (वय ९) या मुलावर तर गुरुवारी पहाटे मॉर्निंग वॉकसाठी बाहेर पडलेल्या मंजुळा चव्हाण (वय ६५) आणि योगिता थोरवे (वय ४४) या दोन महिलांवर हल्ला केला. संजयनगर, दहिवली येथील अर्जुन म्हसे (वय ७०) यांचा या हल्ल्यात गंभीर दुखापत झाल्याने मृत्यू झाला, तर अन्य दोन जखमींवर उपचार सुरू आहेत.
घटनेची माहिती मिळताच कर्जत पोलिस व नगर परिषद कर्मचाऱ्यांनी घटनास्थळी धाव घेतली. गुरुनाथ साठेलकर यांच्या हेल्प फाउंडेशनच्या रेस्क्यू पथकाने अथक प्रयत्नांनी या बैलाला पकडून बांधून ठेवले. नागरिकांची गर्दी आणि तणाव पाहता पोलिसांनी घटनास्थळी चोख बंदोबस्त ठेवून परिस्थितीवर नियंत्रण मिळवले.