पावसामुळे दीपोत्सव काळवंडला

मोखाडा, ता. २३ (बातमीदार) ः परतीच्या पावसाचा फटका दिवाळी सणाला बसला आहे. ऐन लक्ष्मीपूजन सुरू होण्यावेळी पावसाने विजेच्या कडकडाटात हजेरी लावली आणि बत्ती गुल झाली. त्यामुळे दिव्यांच्या उजेडात भाविकांना लक्ष्मीपूजन, तर व्यापाऱ्यांना चोपडीपूजन करावे लागले. सणासाठी नटूनथटून फटाके फोडण्यासाठी आतुरलेल्या बच्चेकंपनीचाही पावसाने हिरमोड झाला आहे. विद्युत रोषणाई आणि दिव्यांच्या प्रकाशाचा दीपोत्सव पावसामुळे काळवंडला.

यंदा तब्बल सहा महिन्यांपासून पाऊस कोसळत आहे. त्यामुळे शेतकरी मेटाकुटीस आला आहे. परतीच्या पावसाने थोडेफार बचावलेले आणि कापणीस आलेले परिपक्व पीक ही शेतातच आडवे झाले आहे. त्यामुळे शेतकऱ्यांच्या घरात अथवा खळ्यावर पीक आले नाही. परिणामी, शेतकऱ्यांची काळी दिवाळी झाली आहे. दिवाळी सणाला सरकारची मदत न मिळाल्याने शेतकरी हवालदिल झाले आहेत.

दिवाळी सण सुरू असताना दररोज मोखाडा तालुक्यात वेगवेगळ्या भागात पाऊस कोसळला आहे. लक्ष्मीपूजन आनंदाने साजरे होईल, अशी अपेक्षा नागरिकांना होती; मात्र पूजनाची वेळ होताच मंगळवारी (ता. २१) संध्याकाळी पावसाने हजेरी लावली. जव्हार, मोखाड्यातील वीजपुरवठा खंडित झाला. त्यामुळे लक्ष्मीपूजनावर काळोख पसरला. डहाणू, गंजाड भागात जोराचा पाऊस झाल्याने तेथूनच वीजपुरवठा खंडित झाल्याचे महावितरणकडून समाजमाध्यमांतून नागरिकांना कळविण्यात आले. त्यामुळे घरात पणत्या लावत लक्ष्मीपूजन साजरे करावे लागले आहे. व्यापारीवर्गाने नाराजी दर्शवत चोपडीपूजन केले.