वसई किल्ल्यात छत्रपती शिवाजी महाराजांच्या वेशातील व्यक्तीला सुरक्षकाने फोटो काढताना अडवले

वसई किल्ल्यात फोटो काढायला अडवणूक
मनसे कार्यकर्त्यांकडून सुरक्षा रक्षकाला चोप
बोळिंज, ता. २३ (बातमीदार) : वसईच्या ऐतिहासिक किल्ल्यात छत्रपती शिवाजी महाराजांच्या वेशातील एका तरुणाला हिंदी भाषिक सुरक्षा रक्षकाने फोटो आणि व्हिडिओ शूट करण्यापासून रोखल्याचा व्हिडिओ समाजमाध्यमांवर व्हायरल झाला आहे. या वादाचे रूपांतर भाषिक वादात झाले. कारण सुरक्षा रक्षकाने ‘मला मराठी येत नाही’ असे उत्तर दिले.
हा व्हिडिओ व्हायरल झाल्यानंतर पर्यटकांनी तीव्र नाराजी व्यक्त केली. यानंतर काही तासांतच मनसे कार्यकर्ते सुजित आग्रे यांनी किल्ल्यावर धाव घेतली. परप्रांतीय असलेल्या या सुरक्षा रक्षकाला मनसे कार्यकर्त्यांनी चोप दिला आणि त्याला माफी मागायला लावली.
महाराजांच्या वेशातील तरुणाने सुरक्षा रक्षकाला जोडपी आणि मद्यपी किल्ल्यावर फिरताना तुम्ही का अडवत नाही, असा प्रश्न केला होता. या घटनेमुळे इतिहासप्रेमींमध्ये तीव्र नाराजी व्यक्त झाली. मनसेच्या हस्तक्षेपानंतर या सुरक्षा रक्षकाने मराठी माणसाची आणि महाराष्ट्राची माफी मागितली असून मराठी शिकेन, असे आश्वासन दिले आहे. परप्रांतीय सुरक्षा रक्षकामुळे हा मुद्दा अधिक तापला आहे.
दरम्‍यान, समाजमाध्यमांवर याची चर्चा होत असून मराठी एकीकरण समितीचे अध्यक्ष गोवर्धन देशमुख यांनीदेखील आक्रोश व्यक्त केला आहे.