ग्रामीण संस्कृतीचा माहितीपटातून बोलबाला

जव्हार, ता. ३० (बातमीदार) ः संस्थानकालीन जव्हारमधील आदिवासी संस्कृतीचा आत्मा जिवंत करणारा ‘काठ्या द मेसेंजर’ हा हृदयस्पर्शी माहितीपट कोगदे येथे नुकताच प्रदर्शित झाला. ‘घराघरात संस्कृती, घराघरात अभिमान’ हा संदेश देणाऱ्या या माहितीपटाद्वारे आदिवासी समाजाची समृद्ध परंपरा, पारंपरिक ज्ञान आणि सामाजिक एकात्मतेचा सशक्त संदेश प्रेक्षकांच्या मनावर कोरला गेला.

जव्हार येथील नागरिकांचा नाशिक, ठाणे, मुंबई, पालघर, संभाजीनगर, पुणे, सिल्व्हासा यासारख्या महानगरांशी नियमित संपर्क येतो. येथील युवा वर्ग हा शहरातील विचारसरणीशी समरस होऊन त्या पद्धतीने आपापली जीवनपद्धती जगू लागला आहे. त्यामुळेच आदिवासी युवा वर्ग हा त्यांच्या अंगी असलेल्या कलागुणांना वाव देत येथील संस्कृती माहितीपटाच्या आधारे दाखविण्याकरिता विविध भूमिका करीत आहेत. ‘काठ्या द मेसेंजर’ या माहितीपटाची निर्मिती जव्हार एकात्मिक आदिवासी विकास प्रकल्प यांनी केली आहे.

‘चिरकाल निर्वाणाचं ठाणं’ पोस्टर प्रदर्शित
या उपक्रमाला प्रकाश निकम आणि हिरडपाडा ग्रामपंचायतीच्या सरपंच भारती माळी यांचे मोलाचे सहकार्य लाभले आहे. या माहितीपटाचे पोस्टर ‘चिरकाल निर्वाणाचं ठाणं’ या शीर्षकाखाली नुकतेच प्रदर्शित करण्यात आले होते. आदीदीप प्रॉडक्शन्सची निर्मिती असून, निर्माता डॉ. दीपक चौधरी आहेत. कोगदे ग्रामपंचायत परिसरात झालेल्या कार्यक्रमात प्रेक्षकांनी प्रत्येक दृश्यातून आदिवासी समाजाचे जिवंत स्पंदन अनुभवले.