गुंगीचे औषध देऊन जनावरांची चोरी

अंबरनाथ, ता. २९ (वार्ताहर) ः जनावरांना गुंगीचे औषध देऊन त्यांची चोरी करणाऱ्यांनी अंबरनाथमध्ये धुमाकूळ घातला आहे. महेंद्रनगर परिसरात सोमवारी (ता. २७) पहाटे दोन गायी आणि एक वासराला गाडीत घालून पलायन केल्याची घटना अंबरनाथमध्ये घडली आहे. ही धक्कादायक बाब सीसीटीव्हीत कैद झाली आहे.

अंबरनाथ पश्चिमेतील महेंद्रनगर, जावराईगाव येथे राहणारे सचिन रामदुलार यादव (वय २७) हे तबेला व्यावसायिक आहेत. रविवारी (ता. २६) संध्याकाळच्या सुमारास ते नेहमीप्रमाणे आपली गुरे महेंद्रनगर येथील डोंगरावर चराईसाठी घेऊन गेले होते. पाऊस सुरू झाल्याने ते काही वेळासाठी घरी परतले. त्यानंतर ते गुरांना घेण्यासाठी परतले, तेव्हा त्यांना त्यांच्या दोन गायी आणि एक वासरू त्या ठिकाणी दिसले नाहीत. गुरांचा शोध न लागल्याने यादव यांनी परिसरातील किराणा दुकानातील सीसीटीव्ही कॅमेऱ्यातील फुटेज तपासले, तेव्हा त्यांना धक्कादायक माहिती मिळाली. फुटेजमध्ये सोमवारी पहाटे पावणेतीन वाजण्याच्या सुमारास तीन व्यक्ती एका चारचाकी वाहनातून आले दिसले. त्यांनी गायींना काहीतरी खायला देऊन इंजेक्शनचा वापर करून नंतर जनावरांना गाडीमध्ये भरून पळवून नेल्याचे दिसून आले. याप्रकरणी तीन संशयितांविरुद्ध अंबरनाथ पोलिस ठाण्यात गुन्हा दाखल करण्यात आला आहे. सीसीटीव्ही फुटेजच्या आधारावर पोलिस आरोपींचा शोध घेत आहेत.