पतीकडून महिला डॉक्टरवर खलबत्त्याने मारहाण

अंबरनाथ, ता. २९ (वार्ताहर) : महिला डॉक्टरवर तिच्या पतीने खलबत्त्याने जीवघेणी मारहाण केल्याची धक्कादायक घटना बुधवारी (ता. २९) सकाळी घडली. या मारहाणीत त्या जखमी झाल्या असून, त्यांच्यावर बदलापूर येथील खासगी रुग्णालयात उपचार सुरू आहेत.

अंबरनाथ पश्चिमेतील कोहोजगाव परिसरात रेडिओलॉजिस्ट डॉ. किरण शिंदे या कुटुंबासोबत राहतात. घरगुती वादातून बुधवारी सकाळी त्यांचा पती विश्‍वंभर शिंदे याने त्यांच्या डोक्यावर खलबत्त्याने आघात केला. आरडाओरड ऐकून मुलांनी हस्तक्षेप करून आईचा जीव वाचवला. दोन दिवसांपूर्वी माथेरानला फिरायला गेल्यानंतर एका मित्राकडून आलेल्या मॅसेजवरून राग आल्याने पतीने हा हल्ला केल्याचा दावा डॉक्टरांनी केला आहे. गेल्या काही दिवसांपासून त्यांचा पतीसोबत वाद सुरू होता. यापूर्वीही त्यांनी पतीच्या अत्याचाराविरोधात दोन वेळा अंबरनाथ पोलिस ठाण्यात तक्रार दाखल केली होती. या घटनेबाबत अंबरनाथ पोलिस ठाण्याचे वरिष्ठ निरीक्षक शब्बीर सय्यद यांनी सांगितले, की याप्रकरणी गुन्हा दाखल करण्याची प्रक्रिया सुरू आहे.