सागरी मंथनामुळे विकासाचे ‘अमृत’

सागरी मंथनामुळे विकासाचे ‘अमृत’
मुख्यमंत्री देवेंद्र फडणवीस : सागरी करारांत महाराष्ट्र आघाडीवर

सकाळ वृत्तसेवा
मुंबई, ता. २९ : सागरी मंथनामुळे विकासाचे ‘अमृत’ लाभणार आहे. तीन दिवसांत येथे झालेल्या सखोल चर्चेमुळे देश आणि जगातील सागरी क्षेत्रातील बदल आणि त्याचे फायदे अधिक वेगाने घेता येतील. इंडिया मेरिटाइम वीक महाराष्ट्रासाठी अत्यंत फलदायी ठरले असून, कोट्यवधी रुपयांचे सामंजस्य करार करण्यात आले आहेत, असे प्रतिपादन मुख्यमंत्री देवेंद्र फडणवीस यांनी केले.

पंतप्रधान नरेंद्र मोदी यांच्या प्रमुख उपस्थितीत ‘इंडिया मेरिटाइम वीक-२०२५’अंतर्गत आयोजित ‘मेरिटाइम लीडर्स कॉन्क्लेव्ह’मध्ये ते बोलत होते. या कार्यक्रमाला राज्यपाल आचार्य देवव्रत, केंद्रीय मंत्री सर्बानंद सोनोवाल, केंद्रीय राज्यमंत्री शांतनू ठाकूर, केंद्रीय राज्यमंत्री कीर्तिवर्धन सिंह, उपमुख्यमंत्री एकनाथ शिंदे, उपमुख्यमंत्री अजित पवार आणि अन्य मान्यवर उपस्थित होते.
मुख्यमंत्री फडणवीस म्हणाले, ‘करारांमध्ये बंदरविकास, शिपयार्ड आणि जहाजबांधणी, जलवाहतूक, क्लीन वेसेल्स यांसारख्या क्षेत्रांचा समावेश आहे. सामरिक सामंजस्य करारांमुळे अत्याधुनिक तंत्रज्ञानाच्या मदतीने पंतप्रधान नरेंद्र मोदी यांचे ‘मेरिटाइम व्हिजन’ साकार करण्यासाठी महाराष्ट्र अग्रस्थानी राहील.
मुख्यमंत्री म्हणाले, ‘पंतप्रधान मोदी यांनी सागरी क्षेत्राला नवी दिशा दिली आहे. त्यांच्या नेतृत्वाखाली ‘पोर्ट-लेड डेव्हलपमेंट’द्वारे भारताची सामुद्रिक शक्ती जगासमोर आली आहे. जागतिक व्यापारात भारताची भूमिका आता अधिक ठळक दिसत आहे.’
-----
वाढवणही सर्वोत्तम बंदरात स्थान मिळवेल!
महाराष्ट्र राज्य सागरी क्षेत्रात नव्या ताकदीने उदयास येत आहे. जवाहरलाल नेहरू बंदर प्राधिकरण (जेएनपीए ) हे देशातील सर्वात मोठे कंटेनर हाताळणी करणारे बंदर बनले आहे. वाढवण बंदरही जगातील सर्वोत्तम १० बंदरांत स्थान मिळवेल, असा विश्वास फडणवीस यांनी व्यक्त केला.