''तिने गिळले सूर्याशी'' बावनकशी अशी कादंबरी पद्मश्री मोहन आगाशे यांचे पुस्तक प्रकाशनात गौरवोद्गार

‘तिने गिळिले सूर्याशी’ बावनकशी कादंबरी!
प्रकाशन सोहळ्यात मोहन आगाशे यांचे गौरवोद्गार
मुंबई, ता. २९ ः ‘तिने गिळिले सूर्याशी’ या कादंबरीतील नेमका सूर्य कोणता, त्याची व्याख्या काय, असे प्रश्न पडतात; मात्र ही कादंबरी वाचल्यानंतर त्याचे उत्तर मिळते. ही कादंबरी ऐतिहासिक, रोमांचक, तंत्रशुद्ध आणि बावनकशी असल्याचे गौरवोद्गार ज्येष्ठ अभिनेते व पद्मश्री मोहन आगाशे यांनी केले. ज्येष्ठ ‍लेखिका लक्ष्मी मुर्डेश्वर-पुरी यांच्या मूळ इंग्रजीतील ‘सॉल्व‍िंग द सन’ या कादंबरीच्या मराठी अनुवादित व मधुश्री पब्लिकेशन प्रकाशित आणि मुकुंद वझे अनुवादित ‘तिने गिळिले सूर्याशी’ कादंबरीचा प्रकाशन सोहळा यशवंतराव चव्हाण सेंटर येथे पार पडला.
आपले शिक्षण केवळ बुद्धिनिष्ठ आहे. ते संस्कारमय कसे होऊ शकते, याचा प्रत्यय या कादंबरीतून मिळतो. बौद्धिक शिक्षणासोबत भावनिक समतोल कसा साधायचा, हे आज अभावाने पाहायला मिळते. त्यामुळे ही कादंबरी वेबसीरिजच्या रूपात लोकांपुढे येणे आवश्यक आहे. या कादंबरीत कमालीची उत्सुकता, मोजकी शब्दरचना, भावना व प्रेमाचा अर्मूत मेळ घालण्यात आल्याचेही आगाशे म्हणाले. या कार्यक्रमाला केंद्रीय पेट्रोलियम मंत्री हरदीपसिंह पुरी, डॉ. नरेंद्र जाधव, अभिनेते अतुल कुलकर्णी, लेखक डॉ. अच्युत गोडबोले, विक्रम मल्होत्रा, खासदार सुप्रिया सुळे, अभिनेते रविकिशन, आमदार परिणय फुके, रश्मी देसाई, शायना एनसी, मधुश्री प्रकाशनचे शरद आष्टेकर आदी उपस्थित होते.
----
माझी कादंबरी माहेरी आली!
कादंबरीमागील पार्श्वभूमी सांगताना लक्ष्मी मुर्डेश्वर-पुरी म्हणाल्या, की माझ्या कादंबरीचा मराठीत अनुवाद होणे ही माझ्यासाठी हृदयाची घरवापसी आहे. ही कादंबरी तिच्या माहेरी आली. मला आईने लहानपणी संत मुक्ताबाईची ओळख करून दिली होती. तिच्या ‘मुंगी उडाली आकाशी’ या अभंगाने मी प्रेरित झाले आणि तसेच नाव आपण कादंबरीला दिले. या वेळी डॉ. नरेंद्र जाधव यांनी अभिनेते अतुल कुलकर्णी आणि डॉ. अच्युत गोडबोले यांच्याशी कादंबरीतील बारकाव्यांवर चर्चा केली.