कल्याणमध्ये मद्यपींचा हैदोस

कल्याणमध्ये मद्यपींचा हैदोस
कल्याण, ता. ३० (बातमीदार) : शहरातील पूर्वेकडील काटेमानिवली परिसरात मद्यपी तरुणांनी सार्वजनिक शांतता भंग केल्याचा प्रकार समोर आला आहे. एका तरुणाने रस्त्यावर दारूची बाटली हातात धरून दुचाकीवर बसून नागरिकांना हातवारे केल्याचा व्हिडिओ सध्या समाजमाध्यमांवर व्हायरल झाला आहे. या घटनेमुळे परिसरातील नागरिकांमध्ये तीव्र संताप आहे.

स्थानिकांच्या म्हणण्यानुसार, काटेमानिवली परिसरात अलीकडे मद्यपींचा वावर सातत्याने वाढला आहे. परिसरातील बार, मद्यविक्री केंद्रे आणि अनधिकृत दारूविक्रेत्यांमुळे तरुणांना खुला वावर मिळतो आहे. काही ठिकाणी रस्त्याच्या कडेला बेकायदेशीररीत्या दारू पिण्याचे ‘काउंटर’ उभारले गेले आहेत, जिथे रात्री उशिरापर्यंत मद्यपान आणि खाद्यपदार्थ पुरवले जातात.

महिलांच्या सुरक्षेचा प्रश्न
मद्याच्या नशेत हे तरुण सार्वजनिक ठिकाणी गोंधळ घालतात, ज्यामुळे महिलांना रात्रीच्या वेळी या मार्गावरून जाताना भीती वाटते.

पोलिसांकडे मागणी :
नागरिकांनी या गंभीर प्रकरणाकडे पोलिस प्रशासनाने तातडीने लक्ष द्यावे, अशी मागणी केली आहे. परिसरातील गस्त वाढवून, सार्वजनिक ठिकाणी गोंधळ घालणाऱ्या बेफिकीर टोळक्यांवर ठोस कायदेशीर कारवाई करण्याची मागणी जोर धरू लागली आहे. या प्रकाराला आळा घालण्यासाठी प्रशासन आणि नागरिकांमध्ये समन्वय आवश्यक असल्याचे मत सामाजिक कार्यकर्त्यांनी व्यक्त केले आहे.