कारच्या बोनटवर केक कापत बर्थडे सेलिब्रेशन

सीएनजी पंपाशेजारीच फटाके फोडत वाढदिवस साजरा
कल्याण, ता. ३० (वार्ताहर) : सार्वजनिक सुरक्षेला धाब्यावर बसवत कल्याणजवळील विठ्ठलवाडी बस आगाराच्या व्यवस्थापकाने अत्यंत बेजबाबदारीने वाढदिवस साजरा केल्याचा प्रकार समोर आला आहे.
आगार व्यवस्थापकाने सीएनजी पंपाशेजारीच फटाके फोडत स्वतःच्या कारच्या बोनेटवर केक कापून आनंदोत्सव साजरा केला. या घटनेचा व्हिडिओ समाजमाध्यमांवर व्हायरल झाला आहे. सीएनजी पंप अत्यंत जवळ असल्याने कोणत्याही क्षणी मोठा स्फोट होण्याची भीती होती. व्यवस्थापकाच्या या बेफिकीर कृतीमुळे आगारातील प्रवाशांचा जीव धोक्यात आला होता. या घटनेमुळे प्रवासी आणि नागरिकांनी तीव्र संताप व्यक्त केला आहे. सार्वजनिक सुरक्षेशी खेळणाऱ्या संबंधित अधिकाऱ्यावर कठोर कारवाई करण्याची मागणी नागरिकांनी केली आहे.