शिवसेना नेते दिलीप भोईर यांच्यासह २१ जणांना सात वर्षांची सक्तमजुरी

दिलीप भोईर यांच्यासह २१ जणांना सात वर्षांची सक्तमजुरी
अलिबाग, ता. ३० (वार्ताहर) : भाजपमधून शिवसेना शिंदे गट पक्षात नुकतेच प्रवेश केलेले नेते दिलीप भोईर उर्फ छोटम शेठ यांच्यासह २१ आरोपींना १२ वर्षांपूर्वीच्या (२०१२) चोंढी येथील मारहाणप्रकरणी जिल्हा सत्र न्यायालयाने गुरुवारी (ता. ३०) सात वर्षांची सक्तमजुरी आणि तीन हजार रुपये दंड अशी शिक्षा सुनावली आहे, तर २५ आरोपींपैकी चार आरोपींची न्यायालयाने निर्दोष मुक्तता केली आहे.
चोंढी येथे ११ सप्टेंबर २०१२ रोजी किरकोळ वादातून काँग्रेसचे विजय थळे, रूपाली थळे व इतर कार्यकर्त्यांना भोईर आणि त्यांच्या साथीदारांनी मारहाण केली होती. या घटनेनंतर दिलीप भोईर यांनी अटकपूर्व जामिनासाठी प्रयत्न केले; मात्र उच्च न्यायालयाने तो फेटाळला होता. रायगड जिल्हा परिषदेचे सभापती असताना पोलिस कोठडीत जाणारे ते पहिले सभापती ठरले होते. तब्बल १२ वर्षांनंतर, प्रधान जिल्हा न्यायाधीश राजेंद्र डी. सावंत यांच्यासमोर या प्रकरणाची सुनावणी झाली आणि हा निकाल देण्यात आला. २५ आरोपींपैकी चार जणांची न्यायालयाने निर्दोष मुक्तता केली आहे. आगामी स्वराज्य संस्थांच्या निवडणुकांपूर्वीच भोईर यांना शिक्षा झाल्याने ते निवडणूक लढवू शकतील की नाही, याबाबत चर्चा सुरू झाली आहे.