कल्याण पूर्वेत इमारतीच्या टेरीसवरुन उडी घेऊन महिलेची आत्महत्या?

महिलेची इमारतीवरून उडी घेत आत्महत्या?
कल्याण, ता. ३१ (वार्ताहर) : कल्याण शहराच्या पूर्व भागात शुक्रवारी (ता. ३१) एका महिलेने मेट्रो इमारतीच्या गच्चीवरून उडी घेऊन आत्महत्या केली आहे. आत्महत्या करणाऱ्या महिलेचे नाव कल्याणी झा असून, त्या दिल्लीतील एका खासगी कंपनीत कामाला होत्या.
कल्याणी काही महिन्यांपासून आजारी असल्याने उपचारासाठी कल्याणमधील नातेवाइकांकडे आल्या होत्या. नातेवाइकांनी त्यांना डोंबिवलीतील रुग्णालयात उपचारासाठी नेले असता, डॉक्टरांनी त्यांना ॲडमिट करण्याचा सल्ला दिला. हे ऐकून कल्याणी त्या ठिकाणाहून निघून गेली. शोध घेत असताना त्या कल्याणमधील नातेवाइकांच्या घरी आल्या. घराला कुलूप असल्याने त्यांनी थेट १९ मजली इमारतीची गच्ची गाठत तेथून उडी मारली.
आजारपणाला कंटाळूनच त्यांनी हे टोकाचे पाऊल उचलल्याची प्राथमिक माहिती आहे. या घटनेचा अधिक तपास कोळसेवाडी पोलिस करत आहेत.