स्विमिंग पूल मध्ये बुडून बालकाच्या मृत्यू प्रकरणी कोच आणि मॅनेजर वर गुन्हा दाखल

जलतरण तलावात बुडून साडेतीन वर्षांच्या बालकाचा मृत्यू
बोळिंज, ता. ३१ (बातमीदार) ः वसई विरार शहरातील विरार (पश्चिम) येथील यशवंतनगर भागातील अमेय क्लब जलतरण तलावामध्ये मंगळवारी (ता. २८) सायंकाळी ध्रुव बिष्ट (वय ३.५) या बालकाचा बुडून मृत्यू झाल्याची घटना घडली. या घटनेप्रकरणी बोळिंज पोलिस ठाण्यात मॅनेजर प्रवीण झरे आणि स्विमिंग कोच कौस्तुभ मेहेर व हर्ष शेट्टी यांच्याविरोधात दुर्लक्ष आणि निष्काळजी यासाठी शुक्रवारी (ता. ३१) गुन्हा दाखल करण्यात आला आहे.
ध्रुव बिष्ट हा आपल्या आईसोबत मंगळवारी सायंकाळी साडेचारच्या सुमारास अमेय क्लबच्या जलतरण तलावात पोहण्यासाठी गेला होता. पोहत असताना त्याच्या नाका-तोंडात पाणी जाऊन श्वास अडकल्याने तो बुडाला आणि त्याचा मृत्यू झाला. ध्रुव दिसेनासा झाल्याने त्याच्या आईने कोचला विचारणा केली असता, त्याने ध्रुव बाथरूमसाठी गेला असल्याचे सांगितले. आईने आरडाओरडा केल्यानंतर ध्रुव स्विमिंग पुलाच्या तळाशी मृतावस्थेत आढळून आला. या घटनेमुळे शहरातील तरणतलावांच्या सुरक्षिततेचा प्रश्न पुन्हा एकदा ऐरणीवर आला आहे.