तानसात त्रिपुरारी पौर्णिमा महोत्सव

शहापूर, ता. ३ (वार्ताहर) : तालुक्यातील प. पू. सद्‍गुरू रमनाथ महाराज संजीवन समाधी ट्रस्टतर्फे तानसा येथे यावर्षी २९०वा संजीवन समाधी उत्सव आणि त्रिपुरारी पौर्णिमा महोत्सव उत्साहात साजरा होणार आहे. हा सोहळा ३ ते ५ नोव्हेंबरदरम्यान प. पू. सद्‍गुरू अलोकनाथ महाराज यांच्या मार्गदर्शनाखाली पार पडणार आहे. भाविकांसाठी गंगा महायागाचे विशेष आयोजन करण्यात आले आहे.
महोत्सवात दररोज विविध धार्मिक विधी, हवन आणि कीर्तनांचा कार्यक्रम होणार आहे. ३ आणि ४ नोव्हेंबरला प्रायश्चित्त, पश्चात्कर्म, मंडप प्रवेश, देवता स्थापन, प्रधान देवतेचा अभिषेक, अरणी मंथन अग्नी, नवग्रह स्थापन हवन आणि तुलसी विवाह आदी विधी पार पडतील. संध्याकाळी सात ते नऊदरम्यान हभप शिवाजीराव सातपुते आणि हभप संदीप महाराज वाघचौरे यांचे कीर्तन होणार आहे. ५ नोव्हेंबरला महापूजन, हवन, उतरांग बलिदान, पूर्णाहुती व महानैवेद्य होईल. त्यानंतर दुपारी १ वाजता भांडुप येथील श्री साईभजन सांस्कृतिक मंडळाचा सांस्कृतिक कार्यक्रम होईल. संध्याकाळी पौर्णिमेच्या शुभप्रसंगी पारंपरिक पालखी सोहळा काढण्यात येणार आहे. भाविकांनी या भक्तिमय सोहळ्यात सहभागी होऊन दर्शन व महाप्रसादाचा लाभ घ्यावा, असे आवाहन प. पू. सद्‍गुरू अलोकनाथ महाराज यांनी केले आहे.