दिव्यातील इमारतींवर हातोडा

दिव्यातील इमारतींवर हातोडा
रहिवाशांचा तीव्र विरोध; परिसरात तणावाचे वातावरण

सकाळ वृत्तसेवा
ठाणे, ता. ३ : उच्च न्यायालयाच्या आदेशानंतर गेल्या काही महिन्यांपूर्वी दिवा-शिळ परिसरातील २१ अनधिकृत इमारती पालिकेने जमीनदोस्त केल्या. त्यानंतर पुन्हा ठाणे महापालिकेच्या अतिक्रमण नियंत्रण विभागाने सोमवारी (ता. ३) पहाटेपासून दिवा-शिळ परिसरातील अनधिकृत इमारतींवर कारवाईचा बडगा उगारला. दरम्यान, पहाटे सहा वाजल्यापासून पालिका पथकाने या ठिकाणी ठाण मांडले होते. या कारवाईदरम्यान परिसरातील एक ते दीड हजार रहिवाशांच्या जमावाने या कारवाईला विरोध केल्याने परिसरात तणावाचे वातावरण निर्माण झाले होते. अखेर दुपारी रहिवाशांची समजूत काढल्यानंतर पालिकेने येथील ‘लोटस’ इमारतीवर पहिला हातोडा टाकला.

दोस्ती कम्पाउंडमधील आठ अनधिकृत इमारतींवर कारवाई प्रस्तावित आहे. त्यातील लोटस, सॅफ्रॉन आणि लीली या इमारतींवरील काही भागांवर सोमवार दुपारी कारवाई करण्यात आली. या कारवाईत व्यावसायिक गाळे तसेच काही घरांचे दरवाजे आणि खिडक्या तोडण्यात आल्या. परिसरातील सर्व वीज व पाणीपुरवठा खंडित करण्यात आला आहे, अशी माहिती परिमंडळ उपायुक्त सचिन सांगळे यांनी दिली. यापूर्वी दिवा-शिळ खान कम्पाउंड भागातील २१ अनधिकृत इमारतींवरही कारवाई करण्यात आली होती. उच्च न्यायालयाच्या निर्देशानुसार शिळ परिसरातील आणखी ११ इमारतींवर कारवाईचा प्रस्ताव आहे. यातील दोन इमारती पावसाळ्यापूर्वी पाडण्यात आल्या असून, उर्वरित इमारतींमध्ये सध्या ३२९ कुटुंबे वास्तव्यास असल्याचे समोर आले आहे. या अनधिकृत इमारती गेल्या पाच ते सहा वर्षांत उभारण्यात आल्या असून, दोन विकसकांमधील वाद न्यायालयात पोहोचल्यानंतर न्यायालयाने थेट इमारतींच्या पाडकामाचे आदेश दिले.

उर्वरित इमारतींवर टप्प्याटप्प्याने कारवाई
प्रशासनाने पावसाळा, सण-उत्सव आणि पोलिस बंदोबस्ताच्या अभावामुळे ही कारवाई पुढे ढकलली होती. अखेर सोमवारी चार उपायुक्त, सहा सहाय्यक आयुक्त, सुमारे २०० पोलिस कर्मचारी आणि एसआरपीएफ तुकडीच्या बंदोबस्तात ही कारवाई करण्यात आली. या कारवाईदरम्यान येथील एका महिलेने अंगावर पेट्रोल ओतून स्वत:ला पेटवून घेण्याचा प्रयत्न केला तसेच जमावानेही कारवाईला तीव्र विरोध दर्शविला. मात्र दुपारी साडेतीनच्या सुमारास परिस्थिती नियंत्रणात आल्यानंतर पाडकाम सुरू करण्यात आले. पुढील काही दिवसांत उर्वरित आठ इमारतींवर टप्प्याटप्प्याने कारवाई करण्यात येणार असल्याचे महापालिकेकडून सांगण्यात आले.