श्वानाच्या मुकामानंतर खोडाळा आरोग्य केंद्रात शिपाई तैनात

रुग्णशय्येवर श्‍वानाच्या आरामानंतर प्रशासन जागे
खोडाळा प्राथमिक आरोग्य केंद्रात शिपाई तैनात

मोखाडा, ता. ३ (बातमीदार) : खोडाळा प्राथमिक आरोग्य केंद्रात गॅस्ट्रोची साथ सुरू असताना, आरोग्य यंत्रणा कमकुवत पडत होती. त्याचवेळी एका श्वानाने आरोग्य केंद्राच्या खाटेवर मुक्काम ठोकल्याचा प्रकार समोर आला. या घटनेचे वृत्त ‘सकाळ’ने प्रसिद्ध केल्यानंतर सरकारी यंत्रणा खडबडून जागी झाली. याप्रकरणी या ठिकाणी कार्यरत असलेल्या वैद्यकीय अधिकारी वर्षा घोडेवार यांना नोटीस बजावण्यात येणार असून, येथे २४ तास शिपाई कार्यरत ठेवण्यात येणार असल्याची माहिती प्रशासनाकडून देण्यात आली. या घटनेची दखल घेऊन काही सामाजिक संघटनांनी आरोग्य प्रशासनाला धारेवर धरले. तालुका वैद्यकीय अधिकारी भाऊसाहेब चत्तर यांनी या काळात कार्यरत असलेल्या वैद्यकीय अधिकारी वर्षा घोडेवार यांना नोटीस बाजवणार असल्याचे सांगितले आहे. तसेच येथे २४ तास शिपाई कार्यरत ठेवणार असल्याचे सांगितले आहे. त्यामुळे येथील रुग्ण आणि नागरिकांना दिलासा मिळाला आहे.