कर्जत येथे साकारणार तिसरे आगरी ग्रंथालय

कर्जत येथे साकारणार तिसरे आगरी ग्रंथालय
कल्याण, ता. ३ (वार्ताहर) : आगरी बोलीभाषा, संस्कृती आणि साहित्याचा वारसा जतन करण्याच्या उद्देशाने आगरी ग्रंथालय चळवळ सुरू करण्यात आली आहे. या चळवळीद्वारे प्रत्येक तालुक्यात एक आगरी ग्रंथालय उभारण्याचा संकल्प असून, वाचन-लेखन संस्कृतीला चालना देणे हा मुख्य उद्देश आहे. युवा साहित्यिक सर्वेश तरे, गीतकार दया नाईक, अभ्यासक मोरेश्वर पाटील आणि साहित्यिक प्रकाश पाटील यांचे या चळवळीत मोलाचे योगदान आहे. यापूर्वी डोंबिवली (निलजे) येथे पहिले आणि कळवा येथे दुसरे ग्रंथालय सुरू झाले आहे. आता या चळवळीचा पुढचा टप्पा म्हणून कर्जत तालुका आगरी समाज संघटनेच्या पुढाकाराने कर्जत येथे तिसरे आगरी ग्रंथालय स्थापन होणार आहे. २३ नोव्हेंबर रोजी आगरी समाज हॉल, नेरळ (कर्जत) येथे या ग्रंथालयाचे लोकार्पण होईल. चळवळीने सर्व आगरी साहित्यिकांना त्यांच्या प्रकाशित साहित्यकृतींच्या किमान तीन प्रती ग्रंथालयासाठी पाठवण्याचे आवाहन केले आहे.