सहाय्यक आयुक्तांची नेमणूक

पालिकेत दोन नव्या सहाय्यक आयुक्तांची नेमणूक
पी-दक्षिण आणि आर-मध्य सहाय्यक आयुक्तपदी नियुक्ती
सकाळ वृत्तसेवा
मुंबई, ता. ४ ः महाराष्ट्र लोकसेवा आयोगाच्या शिफारशीनुसार आणि मुंबई महापालिका आयुक्त भूषण गगराणी यांच्या आदेशानुसार दोन नव्या सहाय्यक आयुक्तांची नियुक्ती करण्यात आली आहे. प्रफुल दिनेश तांबे यांची नियुक्ती बोरिवली येथील आर-मध्य विभागाच्या सहाय्यक आयुक्तपदी, तर अनिरुद्ध गोपाळकृष्ण कुलकर्णी यांची गोरेगाव पश्चिम येथील पी-दक्षिण विभाग सहाय्यक आयुक्तपदी नियुक्ती करण्यात आली आहे. त्यांनी ३ नोव्हेंबरपासून आपल्या पदाचा कार्यभार स्वीकारला आहे.
मुंबई महापालिकेतील काही विभागांमध्ये सहाय्यक आयुक्त पदे रिक्त असल्याने गेल्या काही महिन्यांपासून प्रशासनावर विविध माध्यमांतून टीका होत होती. त्याची दखल घेत पालिका प्रशासनाने तातडीने या दोन नेमणुका केल्या आहेत. न्यायालयाने ३१ जानेवारी २०२६ पूर्वी मुंबई महानगरपालिकेच्या निवडणुका घेण्याचे आदेश दिले आहेत. आचारसंहिता लागू झाल्यानंतर अधिकारी बदल्या किंवा नेमणुका करणे शक्य नसते. त्यामुळे प्रशासनाने आवश्यक ते निर्णय वेळेत घेण्यावर भर दिला आहे. या पार्श्वभूमीवर नव्या सहाय्यक आयुक्तांच्या नेमणुका करण्यात आल्या आहेत. महाराष्ट्र लोकसेवा आयोगाच्या शिफारशीनुसार आणि आयुक्त भूषण गगराणी यांच्या निर्देशानुसार यापूर्वीच चार सहाय्यक आयुक्तांची नेमणूक करण्यात आली होती.
............