पालिकेचा बांधकाम व्यावसायिकांना इशारा

पालिकेचा बांधकाम व्यावसायिकांना इशारा
ध्वनी, वायू प्रदूषण रोखण्याचे अवाहन; अन्यथा कारवाईचे संकेत
वाशी, ता. ९ (बातमीदार) ः नवी मुंबई महापालिका क्षेत्रात काही बांधकाम प्रकल्पांमधून वाढत्या ध्वनी आणि वायू प्रदूषणाबाबत नागरिकांच्या तक्रारींच्या पार्श्वभूमीवर पालिकेने बांधकाम व्यावसायिकांना कारवाईचा स्‍पष्ट इशारा दिला आहे. महापालिका आयुक्त डॉ. कैलास शिंदे यांच्या सूचनेनुसार नगररचना विभागाने तत्काळ पावले उचलत सर्व विकसक आणि वास्तुविशारदांची बैठक आयोजित केली होती.
या बैठकीचे अध्यक्षस्थान सहाय्यक संचालक (नगररचना) सोमनाथ केकाण यांनी भूषवले. बैठकीत त्यांनी बांधकामाच्या ठिकाणी संरक्षक कुंपण बांधणे, धूळ नियंत्रणासाठी स्प्रिंकलर आणि फॉगर्स बसविणे, वाहने स्वच्छ ठेवणे, रस्ते व पदपथ स्वच्छ ठेवणे, तसेच ठरवून दिलेल्या वेळेतच बांधकाम करणे या बाबींचे काटेकोर पालन करण्याच्या सूचना दिल्या. तसेच सीसीटीव्ही कॅमेरे बसवून बांधकामस्थळांवर देखरेख ठेवावी, असा सल्लाही देण्यात आला. महापालिकेने यासाठी ‘मानक कार्यप्रणाली तयार केली असून, तिची सविस्तर माहिती विकसकांना देण्यात आली. या नियमांचे पालन न करणाऱ्यांवर दंडात्मक आणि प्रशासकीय कारवाई होणार असल्याचेही स्पष्ट करण्यात आले आहे. सहाय्यक संचालक केकाण यांनी सांगितले की, बांधकामामुळे नागरिकांना त्रास होऊ नये, हे सर्व विकासकांचे कर्तव्य आहे. मानक कार्यप्रणालीचे उल्लंघन झाल्यास संबंधित विकासकांवर दंड आकारण्यात येईल. तसेच उल्लंघन कायम राहिल्यास त्या बांधकाम प्रकल्पांना स्थगिती आदेश दिला जाईल.