पालघरच्या नाकोडा ज्वेलर्सच्या दुकानात दरोडा

पालघरच्या नाकोडा ज्वेलर्सच्या दुकानात दरोडा

पालघर, ता. ९ ः पालघर शहरातील मुख्य भाजी बाजारपेठेत असलेल्या नाकोडा ज्वेलर्सच्या दुकानात दरोडा पडला. दुकानाला लागून असलेल्या दुसऱ्या दुकानाच्या भिंतीला भगदाड पाडून चोरट्यांनी लाखो रुपयांचे सोन्याचे दागिने लंपास केले. या घटनेनंतर इमारतीचा सुरक्षा रक्षक गायब असल्याने तोच चोर असावा, असा संशय व्यक्त केला जात आहे.
अंबर शॉपिंग सेंटर ही दुमजली इमारत असून वर्दळीच्या ठिकाणी आहे. तळमजल्यावर नाकोडा ज्वेलर्स हे दुकान आहे. या दुकानात शनिवारी (ता. ८) मध्यरात्रीनंतर दरोडा पडला असावा, असा अंदाज वर्तवला जात आहे. चोरट्याने शेजारील दुकानाच्या भिंतीला भगदाड पाडून ज्वेलर्सच्या दुकानात प्रवेश केला. दुकानातील तिजोरी कापून त्यातून मौल्यवान दागिने चोराने लंपास केले. दुकानावर सीसीटीव्ही कॅमेरे आहेत; मात्र त्याच्या वायरी चोराने कापल्याचे निदर्शनास आले. या चोरीप्रकरणी पालघर पोलिसांनी गुन्हा दाखल केला आहे.
---