वाडा नगरपंचायतीत नव्या चेहऱ्यांना संधी

वाडा, ता. १० (बातमीदार) : नगर पंचायतीच्या निवडणुकीत सर्व राजकीय पक्ष नव्या चेहऱ्यांना संधी देणार आहेत. त्यामुळे या वेळी युवकांचा भरणा जास्त प्रमाणात नगर पंचायतीमध्ये दिसून येणार आहे.

वाडा नगर पंचायतीची निवडणूक २ डिसेंबरला होत असून, आज (ता. १०)पासून उमेदवारी अर्ज दाखल करायला सुरुवात झाली आहे. या निवडणुकीत महाविकास आघाडी, भाजप, शिवसेना एकनाथ शिंदे गट व राष्ट्रवादी काँग्रेस अजित पवार गट अशी चौरंगी लढत होणार असल्याची चिन्हे दिसत आहेत. या सर्व पक्षांमध्ये युवकांनी आपआपली उमेदवारी त्या-त्या पक्षांकडे मागितल्याने युवकांचा मोठा भरणा होणार आहे. मविआतील शिवसेना उद्धव ठाकरे पक्षाकडून नगराध्यक्षपदासाठी निकिता गंधे, वर्षा गोळे, उर्मिला पाटील, मनाली फोंडसे, भावना आगिवले आदींनी उमेदवारी मागितली आहे, तर भाजपकडून रिमा हर्षद गंधे आणि स्मिता संतोष पातकर यांनी, शिवसेनेकडून हेमांगी पाटील, नम्रता गणोरे, अस्मिता पाटील यांनी उमेदवारी मागितली आहे. राष्ट्रवादी काँग्रेस अजित पवार पक्षाकडून अद्यापही नाव जाहीर केलेले नाही. यातील अनेक चेहरे हे नवीन आहेत.

मागील वेळी शिवसेना उद्धव ठाकरे पक्षाच्या गितांजली कोळेकर या नगराध्यक्षपदी निवडून आल्या होत्या. त्यामुळे मविआकडून ठाकरे गटाला नगराध्यक्षपदाची जागा दिली जाणार आहे. तरुणांनी आपआपल्या पक्षाकडे उमेदवारी मागितल्याने नगर पंचायतीत नव्या चेहऱ्यांचा जास्त भरणा होईल, असे दिसून येत आहे.