किरकोळ कारणावरून मारहाण

किरकोळ कारणावरून मारहाण
अंबरनाथ ता. १० (वार्ताहर) : अंबरनाथ पूर्वेतील जागृती गल्ली परिसरात किरकोळ कारणावरून तरुणावर दगडाने हल्ला केल्याची घटना घडली आहे. याप्रकरणी शिवाजीनगर पोलिस ठाण्यात गुन्हा दाखल करण्यात आला आहे. मिळालेल्या माहितीनुसार, आवेश सुधीर कांबळे हा टेम्पोचालक असून, तो गायकवाड पाडा, उल्हासनगर येथे राहणारा आहे. शनिवारी संध्याकाळी साडेपाचच्या सुमारास तो खामदेव पाडा येथून गायकवाड पाडाकडे पायी जात असताना जागृती गल्लीजवळ त्याच्या ओळखीचा नितीन विष्णू भोपी याच्याशी भेट झाली. कांबळे यांनी त्याला “नितीनभाऊ, कसा आहेस?”अस विचारले असता भोपी याला राग आला आणि याच रागातून त्याने कांबळे यांना शिवीगाळ करत मारहाण सुरू केली. यानंतर आरोपीने जवळच पडलेला दगड उचलून आवेशच्या डोक्यात मारहाण करून दुखापत केली. याप्रकरणी शिवाजीनगर पोलिस ठाण्यात गुन्हा दाखल केला असून, पुढील तपास पोलिस करत आहेत.