ज्येष्ठ अभिनेत्री कामिनी कौशल यांचे निधन

ज्येष्ठ अभिनेत्री कामिनी कौशल यांचे निधन
मुंबई, ता. १४ : सात दशकांपासून प्रेक्षकांच्या मनावर अधिराज्य गाजवणाऱ्या ज्येष्ठ अभिनेत्री कामिनी कौशल (वय ९८) यांचे गुरुवारी रात्री निधन झाले. त्यांच्या पश्चात तीन मुले आहेत. १९४६मध्ये ‘नीचा नगर’ चित्रपटातून कामिनी कौशल यांनी पदार्पण केले. त्यांच्या या चित्रपटाला पहिल्या कान्स फिल्म फेस्टिव्हलमध्ये सर्वोत्कृष्ट चित्रपटाचा बहुमान मिळाला होता. दिलीप कुमार, राज कपूर, अशोक कुमार, धर्मेंद्र, देवानंद आदी दिग्गज अभिनेत्यांसोबत त्यांनी काम केले. ‘दो भाई’, ‘शहीद’, ‘नदिया के पार’, ‘जिद्दी’, ‘अर्जू’, ‘अबरू’, ‘भिगी रात’ अशा अनेक चित्रपटांतील त्यांच्या भूमिका आजही स्मरणात आहेत. १९६० नंतर त्यांनी सहाय्यक भूमिकांमधून स्वतःची वेगळी ओळख निर्माण केली. अलीकडच्या काळात त्या ‘चेन्नई एक्सप्रेस’, ‘कबीर सिंग’ आणि ‘लाल सिंह चड्ढा’ या चित्रपटांत झळकल्या होत्या. कामिनी कौशल यांनी हिंदी चित्रपटसृष्टीत नवा पाया घालत साधेपणा, शालीनता आणि प्रतिभेचा अप्रतिम संगम दाखवला. त्यांच्या निधनामुळे भारतीय सिनेसृष्टीत एक पोकळी निर्माण झाली आहे.