संदेश विद्यालय अँड ज्युनिअर कॉलेजला समूहगीत गायन स्पर्धेत प्रथम क्रमांक

संदेश विद्यालयाला समूहगीत गायन स्पर्धेत प्रथम क्रमांक
घाटकोपर, ता. १६ (बातमीदार) ः मुंबई विभागीय सहशालेय उपक्रम स्पर्धा २०२५-२६ अंतर्गत आयोजित समूहगीत गायन स्पर्धेत ज्ञान प्रसारक शिक्षण संस्थेच्या पार्कसाईट, विक्रोळी येथील संदेश विद्यालय आणि कनिष्‍ठ महाविद्यालय यांनी उत्कृष्ट कामगिरी करत प्रथम क्रमांक पटकावला. महाराष्ट्र राज्य जवाहर बाल भवन, मुंबई चर्नी रोड येथे बालदिनानिमित्त आयोजित या स्पर्धेत शाळेला देशभक्तीपर समूहगीत सादर करण्याचा बहुमान मिळाला. प्रभावी सादरीकरणाने परीक्षकांची मने जिंकत विद्यार्थ्यांनी सर्वांवर छाप पाडली.
या वेळी बालरंगभूमी परिषद महाराष्ट्र अध्यक्षा अभिनेत्री नीलम शिर्के यांच्या हस्ते विजेत्या विद्यार्थ्यांना पारितोषिक देण्यात आले. संस्थेच्या अध्यक्षा पुष्पलता बाळासाहेब म्हात्रे, विश्वस्त प्राचार्य राजेंद्र महादेव म्हात्रे, प्राचार्य मेघा म्हात्रे यांनी विजयी विद्यार्थ्यांचे अभिनंदन केले.