वाहतूक नियमनावरून तंबी

वाहतूक नियमनावरून तंबी
पनवेल येथे अधिकाऱ्यांकडून मार्गदर्शन
नवीन पनवेल, ता. १७ (बातमीदार)ः पनवेल रेल्वेस्थानक परिसरातील रस्त्यावर रिक्षाचालक बेदरकारपणे रिक्षा चालवतात. वाहतूक नियम पाळत नसल्याने अशा रिक्षाचालकांना पनवेल शहर वाहतूक विभागाच्या अधिकाऱ्यांकडून मार्गदर्शन केले जात आहे.
पनवेल परिसरात रिक्षाची संख्या वाढत चालली आहे. यामुळे बेशिस्त वाहतुकीमुळे परिसरातील विविध चौकात वाहनांची कोंडी होऊन पादचाऱ्यांना त्रास सहन करावा असल्याने नागरिकांच्या तक्रारी वाढल्या होत्या. रिक्षाचालकांना शिस्त लागावी, या पार्श्‍वभूमीवर पनवेल शहर वाहतूक विभागाचे वरिष्ठ पोलिस निरीक्षक औदुंबर पाटील यांच्या मार्गदर्शनाखाली पोलिस उपनिरीक्षक वाहतूक जीवन शेरखाने, एसआय येळे, पोलिस हवालदार मुलाणी यांनी पनवेल रेल्वेस्थानक परिसरातील रिक्षाचालकांची बैठक घेऊन वाहतूक नियमांचे पालन करावे अन्यथा कायदेशीर कारवाईला सामोरे जावे, असा सूचक इशारा दिला. तसेच वाहतुकीची कोंडी होणार नाही, अशा पद्धत्तीने वाहने लावावीत, असे बजावले.
----------------------------
अपघातांची शक्यता
रिक्षांमध्ये तीन प्रवासी घेण्याची मुभा असताना आठ-दहा प्रवासी वाहतूक होते. काही रिक्षाचालकांनी पाठीमागील बाजूस जाळी लावली आहे. त्यातूनही प्रवासी वाहतूक सुरूच असते, तर चालक सीटवर दोन-तीन प्रवासी बसवून घेतात. त्यामुळे अपघात होण्याची शक्यता अधिक असते.