निवडणुकीआधी विकासकामांची लगीनघाई

निवडणुकीआधी विकासकामांची ''लगीनघाई''
ठाणे जिल्हा परिषदेत प्रस्तावांची युद्धपातळीवर तयारी
ठाणे, ता. १९ : राज्यातील नगरपालिका आणि नगरपरिषद निवडणुकांची रणधुमाळी सुरू असतानाच, आता जिल्हा परिषद आणि पंचायत समितीच्या निवडणुकांचे वेध लागले आहेत. जिल्हा परिषद निवडणुकीची आचारसंहिता कोणत्याही क्षणी लागू होण्याची शक्यता असल्याने ठाणे जिल्हा परिषद प्रशासनाने विविध विकासकामांचे प्रस्ताव तयार करण्याची आणि त्यांना प्रशासकीय मान्यता मिळवण्याची ''लगीनघाई'' सुरू केली आहे.

आचारसंहिता लागू होण्यापूर्वी विकास कामांचे प्रस्ताव तयार करून त्यांना प्रशासकीय व तांत्रिक मान्यता घेण्याच्या कामाला प्रशासनाने वेग दिला आहे. ठाणे जिल्ह्यातील शहापूर, मुरबाड, कल्याण, भिवंडी आणि अंबरनाथ या पाचही तालुक्यातील विकास कामांचे प्रस्ताव तयार केले जात आहेत. ग्रामीण भागातील नागरिकांशी थेट संबंधित असलेल्या योजनांना सध्या प्राधान्य दिले जात आहे. जोड रस्त्यांची कामे, गटार बांधणी, पायवाटा इत्यादी कामे जोरात सुरू आहेत. शेती, पशुसंवर्धन यांसारख्या विभागांच्या वैयक्तिक लाभाच्या तसेच गट पद्धतीने देण्यात येणाऱ्या लाभाच्या योजनांना गती दिली जात आहे.

माजी लोकप्रतिनिधींची धावपळ
जिल्हा परिषदेच्या निवडणुकीचे बिगुल कधीही वाजण्याची शक्यता असल्याने, माजी लोकप्रतिनिधींची लगबग वाढली आहे. आचारसंहितेपूर्वी आपल्या गटात किंवा गणात विकासकामे सुरू व्हावीत आणि त्यांचे नारळ फोडता यावेत, यासाठी हे लोकप्रतिनिधी जिल्हा परिषदेच्या पायऱ्या झिजवताना दिसत आहेत.