चारोटी–कासा राज्य मार्गावर तात्पुरती डागडूजी

चारोटी-कासा रस्त्याची कायमस्वरूपी दुरूस्तीची मागणी
कासा, ता. १९ (बातमीदार) : कासा राज्य मार्गाची खड्ड्यांमुळे अत्यंत दुरवस्था झाली आहे. पावसाळ्यात गटाराअभावी पाणी रस्त्यावरून वाहून गेल्याने रस्ता मोठ्या प्रमाणात वाहून गेला. डहाणू-जव्हार मार्गावर असणाऱ्या या रस्त्यामुळे वाहनधारक, विद्यार्थी, रुग्ण आणि गरोदर महिलांना जीव मुठीत घेऊन प्रवास करावा लागत आहे. धुळीमुळे व्यापारी आणि नागरिक त्रस्त आहेत.
नागरिकांमध्ये वाढता संताप पाहून सार्वजनिक बांधकाम विभागाने दोन दिवसांपूर्वी खडी-वाळू आणि डांबर वापरून तात्पुरती डागडूजी केली आहे. ही तात्पुरती मलमपट्टी नको, तर कायमस्वरूपी दुरुस्ती करण्याची मागणी नागरिकांकडून जोर धरत आहे. सार्वजनिक बांधकाम विभागाचे उपविभागीय अभियंता नितीन पगारे यांनी सांगितले की, सध्या खड्डे बुजवण्याचे काम सुरू आहे आणि नूतनीकरणाचे काम बजेटमध्ये समाविष्ट केले आहे; मंजुरी मिळताच नवीन काम सुरू केले जाईल.