तरुणीच्या विनयभंगप्रकरणी पळून गेलेल्या आरोपीस अटक

तरुणीच्या विनयभंगप्रकरणी पळून गेलेल्या आरोपीस अटक
अंधेरी, ता. १९ (बातमीदार) ः खार येथे एका २७ वर्षांच्या तरुणीच्या विनयभंगप्रकरणी पळून गेलेल्या सुनील विष्णू वाघेला या २५ वर्षांच्या आरोपी तरुणाला खार पोलिसांनी दोन दिवसांपूर्वी अटक केली. तो सध्या पोलिस कोठडीत असून, त्याची चौकशी सुरू आहे. स्कुटीच्या क्रमांकावरून या आरोपीला पकडण्यात यश आल्याचे पोलिसांनी सांगितले. तक्रारदार तरुणी ही वांद्रे येथे राहते. ती फ्रेंच शिक्षिका म्हणून काम करते. गेल्या आठवड्यात ती तिच्या खार येथील मैत्रिणीच्या घरी गेली होती. रात्री सव्वाबारा वाजता ती तिच्या घरातून निघाली. रस्त्याने पायी चालत असताना स्कुटीवरून आलेल्या एका तरुणाने विनयभंग केला होता. या घटनेनंतर तो पळून गेला होता. या घटनेनंतर तिने खार पोलिसांना घडलेला प्रकार सांगून आरोपी तरुणाविरुद्ध तक्रार केली होती. सुनील हा धारावीतील एमपी नगर, मरिअम्मा चाळीत राहात असून, त्याचा स्वतःचा व्यवसाय आहे. अटकेनंतर त्याला रविवारी दुपारी वांद्रे येथील स्थानिक न्यायालयाने पोलिस कोठडी सुनावली आहे.