कल्याणमध्ये पादचाऱ्याची सोनसाखळी लंपास!

कल्याणमध्ये पादचाऱ्याची सोनसाखळी लंपास!
‘मी इथला भाई’ म्हणत धमकावून चोरी; कोळसेवाडी पोलिस आरोपीच्या शोधात
सकाळ वृत्तसेवा
डोंबिवली, ता. २३ : कल्याण पूर्वेकडील लोकग्राम परिसरात एक धक्कादायक घटना घडली आहे. गुरुवारी (ता. २०) रात्री एका पादचारी व्यक्तीच्या गळ्यातील सोन्याची साखळी ‘मी इथला भाई’ असल्याची बतावणी करणाऱ्या एका व्यक्तीने मोठ्या चपळाईने लंपास केली. याप्रकरणी कोळसेवाडी पोलिसांनी गुन्हा दाखल केला असून, आरोपीचा शोध सुरू आहे.

पोलिसांकडे दाखल तक्रारीनुसार, शशिकांत गोपीनाथ डोंगरे (वय ४०) हे गुरुवारी रात्री ८.३०च्या सुमारास कामावरून घरी परतत होते. लोकग्राम परिसरातील गोदावरी इमारतीसमोर ते मोबाईलवर बोलत चालले असताना, एका अनोळखी व्यक्तीने त्यांना मुद्दामहून धक्का दिला. पुढे गेल्यावर त्या व्यक्तीने डोंगरे यांना थांबवले आणि ‘तू मला धक्का का मारलास? मी इथला भाई आहे,’ अशी धमकी देत त्यांच्याशी दादागिरी सुरू केली.

डोंगरे यांनी दिलगिरी व्यक्त केली. त्यानंतर आरोपीने त्यांच्या गळ्यात हात घातला आणि प्रेमाने बोलण्याचे नाटक केले. याच संधीचा फायदा घेत, चोरट्याने त्यांच्या गळ्यातील १८ ग्रॅम वजनाची आणि ६३ हजार रुपये किमतीची सोनसाखळी काढून तेथून पोबारा केला. काही अंतर पुढे गेल्यावर शशिकांत यांच्या गळ्यातील साखळी चोरी झाल्याचे त्यांच्या लक्षात आले. त्यांनी तत्काळ कोळसेवाडी पोलिस ठाण्यात धाव घेऊन तक्रार दाखल केली. पोलिसांनी या प्रकरणाचा तपास सुरू केला आहे.