भिवंडीत धोकादायक इमारतीवर पालिकेचा हातोडा

भिवंडीत धोकादायक इमारतीवर पालिकेचा हातोडा
भिवंडी, ता. २२ (वार्ताहर) ः शहरातील रस्ते रुंदीकरणाचे काम प्रगतीपथावर असतानाच शहरातील धोकादायक अनधिकृत इमारतींवर सुट्टीच्या दिवशीही कारवाई करण्यात येत आहे. प्रभाग समिती क्रमांक पाचच्या कार्यक्षेत्रात ब्राह्मण आळी, अंबिका नगर येथील १३७ ही अतिधोकादायक वर्गात असलेली तळ अधिक तीन मजली इमारत आहे. या इमारतीवर आयुक्त अनमोल सागर यांच्या आदेशानंतर प्रभाग समिती क्रमांक पाचचे सहाय्यक आयुक्त सईद चिवणे, बीट निरीक्षक हनुमान म्हात्रे, मोमिन मुलताझिम यांच्या नेतृत्वाखाली पथकाने शनिवारी (ता. २२) हातोडा चालवत ही इमारत भुईसपाट केली. या कारवाईमुळे शहरातील अनधिकृत व धोकादायक इमारतीमधील मालमत्ताधारकांमध्ये खळबळ उडाली असून भविष्यात या कारवाया अधिक तीव्र करणार असल्याची प्रतिक्रिया सईद चिवणे यांनी दिली आहे.