मुरबाड शहराच्या सीमेवर बिबट्याचे आगमन

मुरबाड शहराच्या सीमेवर बिबट्याची हजेरी
मुरबाड, ता. २३ (बातमीदार) ः शहराच्या हद्दीतील घोडदेश्वर मंदिराजवळ शनिवारी (ता. २३) पहाटेच्या वेळी बिबट्याने हजेरी लावली. मात्र, मंदिराच्या परिसरात असलेल्या एका कुत्र्याच्या भुंकणण्यामुळे झोपलेल्या कामगारांना जाग आली आणि बिबट्याला जंगलात पळून जावे लागले.
मुरबाड ते मोहरई रस्त्यावर मुरबाडी नदीच्या काठावर घोडदेश्वर मंदिराचा निसर्गरम्य परिसर आहे. या ठिकाणी शंकराचे मंदिर असून तेथे भाविकांची नेहमी वर्दळ असते. मुरबाड, मोहरई, शिरगाव, चिखले या ठिकाणी जाणारे प्रवाशांची या मार्गावरून ये-जा असते. तर, ४०० केवी लाईनचे काम करणारे कामगार तेथे रात्री झोपण्यासाठी येत असतात. याचदरम्यान शनिवारी पहाटे चारच्या सुमारास कुत्र्याच्या भुंकण्याचा आवाज आल्याने हे कामगार जागे झाले असता त्यांना बिबट्या दिसला, अशी माहिती घोडदेश्वर मंदिराचे विश्वस्त जगदीश पाटील यांनी दिली. नागरिकांनी व भाविकांनी मंदिर परिसरात रात्रीच्या वेळी व पहाटेच्या वेळी येताना खबरदारी घेण्याचे आवाहन त्यांनी केले आहे.