डहाणू शहरात प्रचाराला वेग

कासा, ता. २३ (बातमीदार) ः डहाणू नगर परिषद निवडणुकीची रणधुमाळी सुरू असून प्रचाराला जोरदार गती मिळाली आहे. प्रभाग क्रमांक एकमधील माकप आणि शिवसेना उद्धव ठाकरे गटाचे प्रमुख उमेदवारांच्या समर्थनार्थ आमदार विनोद निकोले यांनी उपस्थित राहून प्रचारफेरीत सहभागी झाल्यामुळे कार्यकर्त्यांमध्ये उत्साहाची लाट उसळली. प्रचारफेरीदरम्यान आदिवासी पाडे, विविध वस्त्या आणि व्यापारी परिसरातून दोन्ही उमेदवारांचे स्वागत करण्यात आले. पक्षाचे झेंडे, फलक आणि घोषणांनी प्रभाग दणाणून गेला. नागरिकांशी संवाद साधत स्थानिक समस्या, विकासकामे आणि त्यावरील उपाययोजना याबाबत माहिती देण्यात आली.

या वेळी निकोले म्हणाले, की डहाणू नगर परिषदेत स्वच्छ प्रशासन, पारदर्शक कामकाज आणि सामान्य नागरिकांचे प्रश्न प्राधान्याने सोडवण्यासाठी सक्षम उमेदवारांची गरज आहे. प्रभाग क्रमांक एकमधील उमेदवार जनतेच्या अपेक्षांना न्याय देणारे, प्रामाणिक आणि कार्यक्षम आहेत. प्रभाग एकमधील या संयुक्त प्रचार यात्रेमुळे निवडणूक वातावरण चांगलेच तापले असून स्थानिकांच्या चर्चांना अधिक उधाण आले आहे. या वेळी पालघर जिल्हाप्रमुख गिरीश राऊत, वासू तुंबडे तसेच मोठ्या प्रमाणात कार्यकर्ते उपस्थित होते.