वायु प्रदूषणाची पालिकेकडे तक्रार

वायू प्रदूषणाची पालिकेकडे तक्रार
पनवेल पालिका क्षेत्रात धोक्याच्या पातळीवर
खारघर, ता. २४ (बातमीदार) ः पनवेल महापालिका क्षेत्रात वायू प्रदूषणाची पातळी झपाट्याने वाढत आहे. केंद्रीय प्रदूषण नियंत्रण मंडळाच्या अधिकृत वेबसाईटवर प्रसिद्ध झालेल्या अहवालानुसार पालिका क्षेत्रातील वायू गुणवत्तेचा निर्देशांक २०० पेक्षा जास्त नोंदवला गेला आहे. त्यामुळे श्वसनाचे गंभीर विकार होण्याची शक्यता वाढल्याने शिवसेनेच्या पदाधिकाऱ्यांनी महापालिकेकडे तक्रार केली आहे.
रात्रीच्या वेळी परिसरात धूर तसेच केमिकलयुक्त वायू पसरत असल्यामुळे नागरिकांना त्रास होत असून आहे. त्यामुळे नियमांचे उल्लंघन करणाऱ्या कंपन्यांवर कठोर कारवाईची मागणी शिवसेनेच्या शिष्टमंडळाने अतिरिक्त आयुक्त गणेश शेटे यांची भेट घेऊन केली. या वेळी शिवसेना पदाधिकारी मंगेश रानवडे, ॲड. प्रथमेश सोमण, सचिन मोरे, नितीन काळे उपस्थित होते. शिष्टमंडळाने सादर केलेल्या अहवालाची अतिरिक्त आयुक्त गणेश शेटे यांनी दखल घेत महापालिकेची धूळप्रतिबंधक वाहने सक्रिय करण्याचे आदेश दिले. तसेच आठवडाभरात बैठकीचे आश्वासन दिले.