आजच्या सुनावणीकडे राजकीय पक्षांचे लक्ष

वाडा, ता. २४ (बातमीदार) : राज्यात ५० टक्के आरक्षणाची मर्यादा ओलांडल्याने सर्वोच्च न्यायालयात सुनावणी सुरू आहे. याबाबतची उद्या (ता. २५) सुनावणी होणार असल्याने सर्वच राजकीय पक्षांचे लक्ष याकडे लागले आहे. त्यामुळे वाडा नगरपंचायतीचा प्रचार थंडावला आहे.

वाडा नगरपंचायत निवडणुकीतील आरक्षण एकूण ५० टक्क्यांवर गेल्याने याबाबत काही बदल होण्याची शक्यता आहे. आरक्षित आठ जागा अपेक्षित असताना एकूण आरक्षित जागांची संख्या १० झाली आहे. त्यात चार अनुसूचित जमाती, एक अनुसूचित जाती, पाच नागरिकांचा मागास प्रवर्ग असे एकूण आरक्षण झाले आहे. त्यामुळे ओबीसीमधील दोन जागा सर्वसाधारण होऊ शकतात. त्यामुळे महिला आरक्षण बदलू शकते, असा राजकीय तज्ज्ञांना अंदाज आहे. त्यामुळे सर्व राजकीय पक्षांना न्यायालयाच्या निर्णयाची प्रतीक्षा आहे.