ग्रामीण भागातील खेळाडू आंतरराष्ट्रीय स्तरावर चमकावेत

वाणगावात लवकरच आंतरराष्ट्रीय दर्जाचे क्रीडांगण
वाणगाव, ता. २४ (बातमीदार) : ग्रामीण भागातील खेळाडूंमध्ये प्रतिभा असून त्यांना योग्य दिशा आणि नेतृत्व मिळाल्यास ते आंतरराष्ट्रीय स्तरावर जिल्ह्याचे नाव रोशन करू शकतात, असे प्रतिपादन आसनगाव गुरुकुल शिक्षण संकुलाचे अध्यक्ष मिलिंद पाटील यांनी केले. त्याचप्रमाणे येथे स्थानिकांसह ग्रामीण भागातील क्रिकेटप्रेमींना, खेळाडूंना प्राधान्य देण्यात येईल, अशी ग्वाहीही त्यांनी दिली.
पालघर जिल्ह्यातील ग्रामीण भागात भातकापणीची कामे आटोपल्यानंतर आता तरुणांना क्रिकेटचे वेध लागले आहेत. याच पार्श्वभूमीवर डहाणू तालुक्यातील वासगाव येथे मर्यादित षटकांच्या क्रिकेट स्पर्धेचे आयोजन करण्यात आले होते. त्या वेळी पाटील बोलत होते. सध्या ग्रामीण भागात गाव मर्यादित सामने रंगत असून, शुक्रवार आणि रविवारच्या सुट्ट्यांमध्ये क्रिकेटचा महासंग्राम प्रत्येक गाव-खेड्यात पाहायला मिळत आहे.