करिअर कट्टा रील स्पर्धेत विवा महाविद्यालयाचा डंका

करिअर कट्टा रील स्पर्धेत विवा महाविद्यालयाचा डंका
विरार, ता. २४ (बातमीदार) : महाराष्ट्र राज्य उच्च व तंत्रशिक्षण विभाग आणि महाराष्ट्र माहिती तंत्रज्ञान सहाय्यता केंद्र यांच्या संयुक्त विद्यमाने आयोजित राज्यस्तरीय ‘करिअर कट्टा रील’ स्पर्धेत विरार येथील विवा महाविद्यालयाने प्रथम क्रमांक पटकावला.. बीए इन मल्टिमीडिया अन् मास कम्युनिकेशन विभागाचा विद्यार्थी भावेश विधाते याने राज्यस्तरीय स्पर्धेत प्रथम क्रमांक पटकावला. त्याला मानचिन्ह आणि रोख १५ हजार रुपयांसह प्रमाणपत्र देऊन गौरवण्यात आले.
मौलिकता, तांत्रिक गुणवत्ता, संदेशाची मांडणी आणि अभिनव सादरीकरण या निकषांवर परीक्षकांनी विवा महाविद्यालयाच्या रीलची निवड केली. पालघर जिल्हानिहाय स्पर्धेत भावेश विधाते याने प्रथम, तर चिन्मय भोईर याने द्वितीय क्रमांक मिळवला. महाविद्यालयाच्या प्रभारी प्राचार्या डॉ. दीपा वर्मा यांनी विद्यार्थ्यांच्या सर्जनशीलतेला व्यासपीठ मिळाल्याबद्दल गौरव व्यक्त करून, या यशामुळे विद्यार्थ्यांचा आत्मविश्वास बळकट झाल्याचे सांगितले. करिअरविषयक मार्गदर्शन प्रभावीपणे तरुणांपर्यंत पोहोचवण्यासाठी ही स्पर्धा आयोजित करण्यात आली होती. या विजयामुळे महाविद्यालयात आनंदाचे वातावरण आहे.